The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

Right worshipfull and Reverent Sir, plesith hit you to understonde þat as these daye I have Res[seyved] fro Thomas Betson and fro Thomas Henham iij letterys, that is to saye ij to you and j to Thomas Howlake. And Sir, Thomas did write to me that I shuld shippe þe sarpler, the pooke, and the ij pokets woll, beyng at the Wollkey, now at this shippynge: And whan I have weyyde heme to reconne with þe custumerys clarkys and pay þem for you and for heme ij. s. iiij. d., and to the weyor ffor every sake j. d., and to þe chalker j. d., and to þe porors viij. d.: thys is Thomas Betson is wrytyng to me. And Sir, I have delivered to William Somer, bargemane, to care to Henly: ffirst vj burdenys of rusys: Item xij saltffish, of þe whiche saltffish iiij be lengys: and a fardell aynte (?) in canvase, in þe wheche fardell is a bage with spysys, and ij brassys, a payer of pauenys for my maistres, a gowne of annyse de Padawis, and a mustard querne: and as these day at none þe barge departyd fro London; and he saythe he will be at Henli a Mondaye, or a Tuysdaye at þe fardyst, with the grase of God, wo have you in hese kepynge. At London, the ix daye of Maye,

Right worschipffull Syr, please it you to wete that I send you wrytinge bi Howlake þat Edmond Jod your tenante will departe owte of your howse I cannat tell wo sone, but I had no aunswer fro you agene for kowenat what comnante is betwyne you and heme, and therfor I beseche your maisterchip to let me have kowelige what comnante ys betwne you and heme, for I can nothenge say to heme till I have an aunswer fro you or fro my mastres. And sir, I have