The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

My right trusty and well enprovyd Brothyr, y recommend me unto yow: desiryng to here of your well fare. The cause of my wrytyng unto yow at this tyme is for this cause, mervelyng me gretly þat ye send me nat my monay, for I have wretyn unto yow sondry tymys and I have nevyr non answer aȝeyn þerof; wherfor y besech yow, good brothyr, þat ye will delyver the seid mony unto my neve Sulyard now at this terme, and he xal endente with yow therfor. And, good Brothyr, fayle me nat now in my gret necessyte, for y had nevyr so mych nede therof in my lyve; for in good feyth, brothyr, I moste pay gret somme of mony now at this lenton tyme on our lady day: and þerfor I besech yow fayll me nat now, as ye wyll have eny good turne of me anothyr day. No more to yow at this tyme, but God have yow in his kepyng. Wretyn at Eye Abey the xxviij day of Janyver.

My ryght reverent and wurshypfull fadyr, I recomaund me unto your good fadyrhod in the most umbull vyse that I kan or may, mekely besechyng your fadyrhod of your dayly blessyng: lykyth your fadyrhod to wyt that my modyr ys in good hele, blessyede be alle myty Jhesu, my brethern and my susters and my nevue Cottysmore. I beseche your good fadyrhod that yt wylle plese yov to speke with the Abbot of Dorchester that I may have suche fe as Marmyun had with hym with every thyng acordyng as he had: for I trust thorov your good fadyrhod that I may have hyt. And I beseche your fadyrhod to wryte for me to the pryor of Wychyswyde for such fe as he had there: and I trust