The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

her owne mynde, þat shee desyreth as sore after relief, as fer as shee may for shame, as þe man in the water desyreth to be releved frome drownyng in þe perill of þe see: but daunger and shame woll not suffir her to speke yt with oute it be so þat þer be sume newe mocyon made to her &c.: the menes wherof I have compassid in my mynde, which by þe mercy of Gode I woll attempte yf it so be ye kan be plesid þat way, and þat in shorte tyme. Syr, if I may, I woll be with you on Saturday or Sonday &c. I wot well ye remembre what your ffader by his last letter assureþe you in joyntur: and syr, þat ys feyr: and as for oþer thynges touchyng your self, I shall enfourme you at our next metynge to your hertes plesyr, with the mercy of Jhesu, which preserve you.

Right worshipfull Brother, I recomaund me to you. And in as muche as that my Cosen Willyam cumeth home to you hymself, ther|fore I wrytt not to you of the demyng &c., ne of the communicacion betwen my seid Cosen and my Mastres Blounte: but this direccion have I taken in the mater, I have thorowly comyned with the preste þat I spoke to you of, and tolde hym my conceyte howe he shal be demened in brekynge with my seid Mastres: and that he shall not breke to much at oones to her, but ever when he spekyth in the mater to her and fele here, and certenly to marke her wordes unto the tyme that he be verily assured in hymself, as nygh as he kan, of her disposicion. And over þat I have appoynted with hym that withyn iiij dayes after þat he is come to my seide mastres I shal send hym a letter directe to her fro me