The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

Ryght worshipfull Brother, I comaund me unto you. And thogh it so be that, as me thynkyth, ye do not remembre me in suche thynges as is me dewe, my sylver not payd me as yet of oold, a new payment nowe ron bothe: to long burthyn makyth wery bonys &c: Yet to remembre you of thynges which shold concerne you, I wold not that ye, nor noon of your welwyllers, took non thynges but such as myght be to your worship &c. Sir, I avise you that in al hast possible ye dispose you to London, bryngyng with you Thomas Hampdene, your Cosyn, as ye woll his welfar and moo &c. Sir, I knowe him not, and thogh I did, yet it must have wytty gydyng, which in no wyse I woll medyll of withoute it be so that ye or sum other sadd man mo then he be heer: the mater requyreth haste, for such that ye woll not ymagen, and thynges that I woll to no man utter but to you or such as I knowe &c. Sapienti pauca. As for your owne maters, when ye cume ye shal understond al as requyryth: it hath noon hast, but when ye woll, com yourself: the Award of Devonshir is not such as I wold it wer. God preserve you &c. Ye know your seson, kepe it and ye woll &c.

Syr, I recommende me to ȝow. Plesyth ȝow to wete þat upon Wednes|day last passyd my cousin Langforth ys sone browthe ȝow a privy sele, and to all þe jentylmen off þe schyre. So I resseyved sore akenyn my wyll. Y þesyryd of hym to have kept ytt stylle, for ȝe were not at home: butt he wold nott so doo, but counsellyd me to sendyd ȝow in all hast. And he promysys me þat he wold informe þe kyng þat ȝe were not at home, and he told me þat upon þe Thursday folwyng þe kyng remevyth northward, and purposyth into Schottland, ef þen he com akeyn. For