Rythe wurschypf[ull Co]syn, I recommaunde me to yow, letyng yow understande þat my Suster Swete ffulherteyly dayly praying Godd for yourre gode. S[yr, sche recomaunds] her to yow, s[pec]yally prayng yow to do your tender dyligens as unto the parson of Sylverton for þe hafyng of p[rofe . . .]. Syr, ye were no rather gon fro my house but þe parsons man came unto us and lete my Suster understande þat his mayster had ff[ound] fayre evydens under seale to profe Thomas to be sone of syr Water Romsey and Jahne, his ffurst wyff, and with þat sche wuld ordeyne a suffycyaunte persone to be bounde with here in maner and forme, as we ben boundyn and as ye must nedys see: ffor þe sayde Obligacion moste nedys be delyveryd by your hands or by þe hand of Phylyp Pymme acordyng to an endenture made betwene þe parson man and [. . . Mo]reover, Syr, in eny wyse þat we may haf notyse of þe parson what maner tytull Wykes made ffor Stapulham ayenst hym and ayenste Syr J. Beynton, Knyth, and thyf hit were by d[er]ayng, [Hampton wrote "dayng" with an otiose abbreviation mark at the end (as also appears in "ffyndyng" and "Kyng" lower down); he probably meant "derayne".] þat in eny wyse þat we may haf a copye of hit; and thyf hit be by wey of ple, þat we may haf þe Record and what yere hit was, and what terme: and þat þe parson wull stere theym þat were of Beyntons Counsell and his to be of owr Counsell for owr mony. And also, Syr, I lete yow wyte þer schall no more be don to þe offyse ffyndyng in no wyse. Hyth wat ye may þat ye were wyth uns, ye schall understande a beter meane &c. on. Remembre . . . my lord of Suthfolke wull be in the mater and he be made on of þe ffeffes, as ye wull desyr hym ye or naye, or m . . . ch on as ye dar truste: the mater ys beter þen we understode, a grete dell, þankyd be Godd. No more to yow at þis tyme, but he þat made both yow and me preserve us in perpetuyte, Amen.
Wrytyn at London in Our Palys of the Flete, þe laste daye of August.
By your owne Thomas Hampton.
Gode syr, I pray yow remembre Mowne in your comyng homward þat he woll be my gode Cosyn, þer ys non oþer mene, but þe Kyng wull haf mony me semyth by Fowler.
Unto my ryght Wurshypfull Cosyn, Thomas Stonor, be thys de|lyveryd in hast.
