The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

Wurshipfull Sire and maistre, I recommande me to ȝow; and do ȝow to wite þat I am enfourmed þat Osebarn and Cassy have pursued a new writ of quare impedit aȝeyns J. Golafre, J. Warfeld, and þe incumbent, and þoghten, as I suppose, to have hade a pryve recovere: for as Gyles, our attorne of þe chapitre, told me, þat þe processe is at distresse now retournable at þe oeptes or þe quinzisme, I [? know]not qwether. I seend syr John to Gloucestre to þe under-shirreve to have hade a copie: and he said to hym, "kame none write": and so and I suppose þe retourne be pryvele made at London: here is koynt craft. William Alisandre semes most bost and wurship, for all syde þat þai be onsward at þis terme. And if I may ride for þe crikke, I shall kome to ȝow, praing with all myn hert þat ȝe wold be þer &c. Also I send ȝow a copie of þe letters of Institucion and Induccion at þe kynges presentacion &c., praing hertely þat ȝe will vouchesave to konnen with ȝore counseill: for I suppose þai be now at more laiser þen at London &c. Also, Wurschipfull Syr, Cassy hase disabeied þe Juggement of Wilcotes: I send ȝow a copie þerof, and of þe endenture made, þe obligacions be in mennes hondes þ . . . . . [There is a hole in the MS.] dar not delyver ham for hym: I seend ȝow a copie of ham. And truly I wold full fayn þat he were chawfed. Man of lawe say here þat þe parson, my cosyn, and ȝore bedeman, has his accion as for his reparacions, and þe payne of þe obligacion shuld I have: for truly þat was þe entent, þat if my cosyn hat disabeied þe juggement I had forfaited myn obligacion. And me semes þat he shuld be in þe same caas to me. He settes noȝght be noman. And þerfore truly, syr, I wold the poure parson hade resonable reparacion after þe juggement, and þe avantage of þe obligacion stonde in gover|nance of ȝow and ȝore frendes &c. I pray ȝow lette all be seen with gode avys, as my holly trust is in ȝow. Also, syr, I send John to Mr. Gilbert for þe sale of þe land, and he sais Lang, the corser, has been with hym, and if hit shuld be soold be parcelles he wold undertake of vj C. markes and moore &c. And he sais my lord of Duresme has write to hym for a cosyn of his, Mr. J. Fytan. And I shall be at London now at þis terme for finale sale þerof, I suppose. And Mr. G. says, if he may for his foote, he will also. And see ȝe what is best