[Of Somer. Capitulum Lxvijm.]
[folio 71]SOmer Begynnyth in the feste of Seynte Vrbane, and Duryth into the feste of Seynte Symphoriane. [folio 82L] In this tyme the dayes vyxen̄ longe, and the nyghtis shorte. In al regions the hettes bene encreschid, the turmentes of the eeyre swagyth, the see wixit calme, the Serpentis growyth, the wynes growyth, the cornes wixit rippe, And than the world semyth a spowse ful woxen̄ of body. and Parfite age, in ful vertue of natural hete. The tyme of Somyr is hote and dry, and therfor than regnyth reede colere, that hath the same condycion̄, and for that, a man sholde enchu hotte mettis and dry, wych engendryth reede colere. A man Sholde ette mettis of colde and moisti complexcion̄, that the nature ne Passe not ryght ful temprure, as flesh of Velis, Vynegre, hemroƚƚ, and Potage of oot-mell, gourdes and Poumgrenes, and Suche othyr mettis. Also drynke grene wyne, clere, and sharpe, and sparklynge in tempure. Also a man may vse mettis in tempure, that is to witte, that thay be not ouer colde ne ouer hote, and for that the naturale hete of man is more febill in somere, than in othyr tyme, hit nedyth a man do more abstynence in that tyme than in wyntyr, whan the stomake is more hote, by the reyson than in colde tyme the colde chasyth the naturall hete, and the othyr lymes wyche bene wyth-In the body, Company of women̄, mevynge of body, and grete trauaiƚƚ, Swotes, and bathes, a man shold scarsly and seldyn̄ vse, lettynge of blode none vse, but yf grete nede be.