Lines 601 through 700
Myȝt no stede doun stap bot on stele wede
601
Or on burne oþer on beste or on briȝt scheldes
602
So myche was þe multitude þat on þe molde lafte
603
Þer so many wer mar[red] mereuail wer ellis
604
Ȝit wer þe romayns as rest as þey fram rome come
605
[vnrevyn] eche a renk & noȝt a ryng brosten
606
Was no poynt perschid of alle her pris armur
607
So crist his knyȝtes gan kepe tille complyn tyme
608
An hundred þousand helmes of þe heþen syde
609
Wer fey fallen in þe felde [þat no freke skapide]
610
Saue seuen þousand of þe somme þat to þe cite flowen
611
& wy[nn]en with mychel wo þe walles with-ynne
612
Ledes lepen to a-non louken þe ȝates
613
Barren hem bigly with boltes of yren
614
& portecolis with pile picchen to grounde
616
Þei wynnen vp whyȝtly þe walles to kepe
617
Fr[e]sche vnfonded folke & grete defence made
618
Tyeþ in-to tourres tonnes ful manye
619
With grete stones of gret & of gray marble
620
Kepten kenly with caste þe kernels alofte
621
Quar[r]en qu[a]rels out with quart[ote]s attonys
622
Þat oþer folke at þe fote freshly assayled
623
Tille eche dale with dewe was donked aboute
624
With-drowen hem fro þe diche dukes & oþer
625
[for] þe caste was so kene þat come fram þe walles
626
Comen forþe with þe kyng clene as þey ȝede
627
W[ant]ed noȝt o wye ne non þat wem hadde
628
Princes to her pauelouns passen on swyþe
629
Vnarmen hem as tyt & alle þe nyȝt resten
630
With wacche vmbe þe walles to many wyes sorowe
631
Sone as þe rede day ros [o]n þe schye
633
Bemes blowen anon burnes to aryse
634
Þe kyng comaundeþ a cry þat comsed was sone
635
Þe ded bodies on þe bonke barforto make
636
To spoyle þe spilt folke spar scholde none
637
Geten girdeles & ger gold & goode stones
638
Byes broches bryȝt besauntes riche
639
Helmes hewen of gold hamberkes manye
640
Kesten ded vpon ded was deil to byholde
641
Made wide weyes & to þe walles comen
642
Assembleden at þe cite saut to bygynne
643
Ffolke ferlich þycke at þe four ȝates
644
Þey broȝten toures of tre þat þey taken hadde
645
A-ȝen euereche ȝate ȝarken hem hey
646
By-gonnnen at þe grettist a garrite to rer
647
Groded vp fro þe grounde on twelfe grete postes
648
Ffyue hundred in frounte to fiȝten at þe walles
650
Hardy men vp-on haste hyen at þe grecys
651
& bygonnnen with bir þe borow to assayle
652
Quarels flambande of fur flowen out harde
653
& arwes [vn]arwely with attyr enuenymyd
654
Taysen at þe toures tachen on þe jewes
655
Þroȝ kernels cacchen her deþ many kene burnes
656
Brenten & beten doun þat bilde was wel þycke
657
Brosten þe britages & þe brode toures
658
By þat was many bold burne þe burwe to assayle
659
Þe hole batail boun a-boute þe brode walles
660
Þat wer byg & brode & bycchet to wynne
661
Wonder heye to byholde with holwe diches vnder
662
Heye bonked a-bou[t]e vpon boþe sydes
663
Riȝt wicked to wynne bot ȝif wyles helpe
664
Bow-men atte bonke benden her ger
665
Schoten vp scharply to þe schene walles
666
With arwes & arblastes & alle þat harme myȝt
667
Þe jewes werien þe walles with wyles ynowe
669
Hote [p]l[ay]ande picche a-monge þe peple ȝeten
670
Brenn[a]n[d] leed & brynston barels fulle
671
Schoten schynande doun riȝt as schyr water
672
Waspasian wendeþ fram þe walles wariande hem alle
673
Oþer busked wer boun benden engynes
674
Kesten at þe kernels & clustred toures
675
& monye der daies worke dongen to grounde
676
By þat wriȝtes han wroȝt a wonder stronge pale
677
Alle aboute þe burwe with bastiles manye
678
Þat [no freke in myȝt fonde with-owttyn fethyrhames]
679
[ne] no segge vnder sonne myȝt fram þe cite passe
680
Suþ dommyn þe diches with þe ded corses
681
Crammen hit myd karayn þe kirnels vnder
682
Þat þe stynk of þe steem myȝt strike ouer þe walles
683
Þe cors of þe condit þat comen to [þe] toun
685
Stoppen euereche a streem þer any str[ande] ȝede
686
With stockes & stones & stynkande bestes
687
Þat þey no water myȝt wynne þat weren enclosed
688
Waspasian tourneþ to his tente with titus & oþer
689
Commaundeþ consail anon on cayphas to sitte
690
W[hat] deþ by dome þat he dey scholde
691
With þe lettered ledes þat þey lauȝte hadde
692
Domes-men vpon de[y]s demeden swyþe
693
Þat ech freke wer quyk fleyn þe felles of clene
694
Þen to be on a bent with blonkes to-drawe
695
& suþ honget on an hep vpon heye galwes
696
Þe feet to þe firmament alle folke to byholden
697
With hony vpon ech [halfe] þe hydeles anoynted
698
Corres & cattes with claures ful scharpe
699
Ffour kagge[d] & knyt to cayphases þeyes
700
