Lines 101 through 200
& ȝo a mayde vnmarred þat neuer man touched
101
As clene as clef þer cristalle sprynges
102
Without hosebondes helpe saue þe holy goste
103
A touche of þe trinyte touched hir hadde
105
Þre persones in o place preued to gedres
106
Eche grayn is o god & o god bot alle
107
& alle þre ben bot one as eldres vs tellen
108
Þe first is þe fader þat fourmed was neuer
109
Þe secunde is þe sone of his sede growyn
110
Þe þridde in heuen myd hem is þe holy goste
111
Neþer merked ne made bot mene fram hem passyþ
112
Alle ben þey endeles & euer of o myȝt
113
& weren endeles euer [er] þe world was bygonne
114
As sone was þe sone as þe self fader
115
Þe holy goste with hem hadde þey euer
116
Þe secunde persone þe sone sent was to erþe
117
To take careynes kynde of a clene mayde
118
& so vnknowen he came caytifes to helpe
119
& wroȝt wondres ynowe ay tille he wo driede
120
Wyne he wroȝt of water at o word ene
121
Ten lasares at a logge he leched at enys
122
Pyned myd p[ar]il[sye] he putte to hele
123
& ded men fro þe deþ eche day rered
124
Boþ þe dombe & þe deue myd his der wordes
126
Dide myracles mo þan y in mynde haue
127
Nis no clerk with countours couþe aluendel rekene
128
Fyf þousand of folke is ferr to here
129
With two fisches he fedde & fif ber loues
130
Þat eche freke hadde his fulle & ȝit ferre leued
131
Of brede & of broken mete bascketes twelue
132
Þer suwed hym out of an cite [seuenty] & twey
133
To do what he dempte disciples wer hoten
134
Hem to citees he sende his sawes to preche
135
Ay by two & by two til hy wer a-twynne
136
Hym suwed of an-oþer cite semeliche twelue
137
Pore men & noȝt prute aposteles wer hoten
138
Þat of cay[ti]fes he ches holy churche to encresche
139
Þe out-wale of þis worlde þis wer her names
140
Peter James & Jon & Jacob þe ferþe
141
& þe fifþe of his felawys Phelip was hoten
142
Bertholomewe þat his bone neuer breke nolde
144
Þe eyȝt man was Mathu þat is myche yloued
145
Tadde & Tomas her ben ten euen
146
& Andreu þe elleueþ þat auntred hym myche
147
Byfor princes to preche was Petrus broþer
148
Þe laste man was vnlele & luþer of his dedis
149
Judas þat Jesu Crist to þe Jewes solde
150
Suþ hymsulf he slowe for sorow of þat dede
151
His body on a balwe tree to-breste on þe myddel
152
Whan Crist hadde heried helle & was [to] heuen passed
153
For þat mansed man Mathie þey chossyn
154
Ȝit vnbaptized wer boþe Barnabe & Poule
155
& noȝt knewen of Crist bot comen sone after
156
Þe princes & þe prelates aȝen þe paske tyme
157
Alle þei hadde hym in hate for his holy werkes
158
Hit was a doylful dede whan þey his deþ caste
159
Þrow Pilat pyned he was þe prouost of Rome
160
& þat worliche wif þat arst was ynempned
161
Haþ his visage in hir veil Veronyk ȝo hatte
162
For loue he left hit hir til hir lyues ende
164
Þer is no gome [o]n þis [grounde] þat is grym wounded
165
Meselry ne meschef ne man vpon erþe
166
Þat kneleþ doun to þat cloþ & on Crist leueþ
167
Bot alle hapneþ to hele in [ane] hand whyle
168
At Rome reyned þe emperour quoþ þe kyng riche þan
169
Cesar synful wrecche þat sent hym fram Rome
170
Why nadde þy lycam be leyd low vnder erþe
171
Whan Pilat prouost was made suche a prince to jugge
172
& or þis wordes wer [wel] wonne to þe ende
173
Þe canker þat þe kyng hadde clenly was heled
174
With out faute þe face of flesche & of hyde
175
As newe as þe nebbe þat neuer was wemmyd
176
A corteys Crist seide þe kyng riche þan
177
Was neuer worke þat y wroȝt worþy þe to telle
178
Ne dede þat y haue don bot þy deþ mened
179
Ne neuer sey þe in siȝt goddis sone der
180
To stire Nero with noye & newen his sorowe
182
& y schal buske me boun hem bale to wyrche
183
To do þe deueles of dawe & þy deþ venge
184
Telle me tit quoþ Titus what tokne he lafte
185
To hem þat knew hym for Crist & his crafte leued
186
Nempne þe trinyte by name quoþ Nathan at þries
187
& þer myd baptemed be in blessed water
188
Forþ þey fetten a font & foulled hym þer
189
Made hym cristen kyng þat for Crist werred
190
Corrours in to eche coste þan þe cours nomen
191
& alle his baronage broȝt to Burdewes hauen
192
Suþ with þe sondes-man he [s]ouȝt to Rome
193
Þe ferly & þe fair cure his fader to schewe
194
& he gronnand glad grete god þanked
195
& loude criande on Crist carped & saide
196
Worþy wemlese God in whom y byleue
197
[Als] þou in Bethleem was born of a bryȝt mayde
198
Sende me hele of my hurt & heyly y a-fowe
199
