Pearl
E.V. Gordon

Section IV

[folio 41v]
More þen me lyste my drede aros.
I stod ful stylle and dorste not calle;
Wyth yȝen open and mouth ful clos
I stod as hende as hawk in halle.
I hoped þat gostly watȝ þat porpose;
I dred onende quat schulde byfalle,
Lest ho me eschaped þat I þer chos,
Er I at steuen hir moȝt stalle.
Þat gracios gay wythouten galle,
So smoþe, so smal, so seme slyȝt,
Ryseȝ vp in hir araye ryalle,
A precios pyece in perleȝ pyȝt.
Page  8
Perleȝ pyȝte of ryal prys
Þere moȝt mon by grace haf sene,
Quen þat frech as flor-de-lys
Doun þe bonke con boȝe bydene.
Al blysnande whyt watȝ hir beau biys,
Vpon at sydeȝ, and bounden bene
Wyth þe myryeste margarys, at my deuyse,
Þat euer I seȝ ȝet with myn ene;
Wyth lappeȝ large, I wot and I wene,
Dubbed with double perle and dyȝte;
Her cortel of self sute schene,
Wyth precios perleȝ al vmbepyȝte.
A pyȝt coroune ȝet wer þat gyrle
Of mariorys and non oþer ston.
Hiȝe pynakled of cler quyt perle,
Wyth flurted flowreȝ perfet vpon.
To hed hade ho non oþer werle;
Her here leke, al hyr vmbegon,
Her semblaunt sade for doc oþer erle,
Her ble more blaȝt þen whalleȝ bon.
As schorne golde schyr her fax þenne schon,
On schyldereȝ þat leghe vnlapped lyȝte.
Her depe colour ȝet wonted non
Of precios perle in porfyl pyȝte.
[folio 42r]
Pyȝt watȝ poyned and vche a hemme
At honde, at sydeȝ, at ouerture,
Wyth whyte perle and non oþer gemme,
And bornyste quyte watȝ hyr uesture.
Page  9
Bot a wonder perle wythouten wemme
Inmyddeȝ hyr breste watȝ sette so sure;
A manneȝ dom moȝt dryȝly demme,
Er mynde moȝt malte in hit mesure.
I hope no tong moȝt endure
No sauerly saghe say of þat syȝt,
So watȝ hit clene and cler and pure,
Þat precios perle þer hit watȝ pyȝt.
Pyȝt in perle, þat precios pyece
On wyþer half water com doun þe schore.
No gladder gome heþen into Grece
Þen I, quen ho on brymme wore.
Ho watȝ me nerre þen aunte or nece;
My joy forþy watȝ much þe more.
Ho profered me speche, þat special spece,
Enclynande lowe in wommon lore,
Caȝte of her coroun of grete tresore
And haylsed me wyth a lote lyȝte.
Wel watȝ me þat euer I watȝ bore
To sware þat swete in perleȝ pyȝte!