Pearl
E.V. Gordon

Section XVII

[folio 52v]
'If I þis mote þe schal vnhyde,
Bow vp towarde þys borneȝ heued,
And I anendeȝ þe on þis syde
Schal sve, tyl þou to a hil be veued.'
Þen wolde I no lenger byde,
Bot lurked by launceȝ so lufly leued,
Tyl on a hyl þat I asspyed
And blusched on þe burghe, as I forth dreued,
Byȝonde þe brok fro me warde keued,
Þat schyrrer þen sunne wyth schafteȝ schon.
Page  36
In þe Apokalypce is þe fasoun preued,
As deuyseȝ hit þe apostel Jhon.
As John þe apostel hit syȝ wyth syȝt,
I syȝe þat cyty of gret renoun,
Jerusalem so nwe and ryally dyȝt,
As hit was lyȝt fro þe heuen adoun.
Þe borȝ watȝ al of brende golde bryȝt
As glemande glas burnist broun,
Wyth gentyl gemmeȝ an-vnder pyȝt
Wyth banteleȝ twelue on basyng boun,
Þe foundementeȝ twelue of riche tenoun;
Vch tabelment watȝ a serlypeȝ ston;
As derely deuyseȝ þis ilk toun
In Apocalyppeȝ þe apostel John.
As John þise stoneȝ in writ con nemme,
I knew þe name after his tale:
Jasper hyȝt þe fyrst gemme
Þat I on þe fyrst basse con wale:
He glente grene in þe lowest hemme;
Saffer helde þe secounde stale;
Þe calsydoyne þenne wythouten wemme
In þe þryd table con purly pale;
Þe emerade þe furþe so grene of scale;
Þe sardonyse þe fyfþe ston;
Þe sexte þe rybé he con hit wale
In þe Apocalyppce, þe apostel John.
[folio 53r]
Ȝet joyned John þe crysolyt
Þe seuenþe gemme in fundament;
Page  37
Þe aȝtþe þe beryl cler and quyt;
Þe topasye twynne-hew þe nente endent;
Þe crysopase þe tenþe is tyȝt;
Þe jacynght þe enleuenþe gent;
Þe twelfþe, þe gentyleste in vch a plyt,
Þe amatyst purpre wyth ynde blente;
Þe wal abof þe bantels bent
O jasporye, as glas þat glysnande schon;
I knew hit by his deuysement
In þe Apocalyppeȝ, þe apostel John.
As John deuysed ȝet saȝ I þare:
Þise twelue degres wern brode and stayre;
Þe cyté stod abof ful sware,
As longe as brode as hyȝe ful fayre;
Þe streteȝ of golde as glasse al bare,
Þe wal of jasper þat glent as glayre;
Þe woneȝ wythinne enurned ware
Wyth alle kynneȝ perré þat moȝt repayre.
Þenne helde vch sware of þis manayre
Twelue forlonge space, er euer hit fon,
Of heȝt, of brede, of lenþe to cayre,
For meten hit syȝ þe apostel John.