Pearl
E.V. Gordon

Section XVI

'Neuerþelese cler I yow bycalle,
If ȝe con se hyt be to done;
As þou art gloryous wythouten galle,
Wythnay þou neuer my ruful bone.
Haf ȝe no woneȝ in castel-walle,
Ne maner þer ȝe may mete and won?
Þou telleȝ me of Jerusalem þe ryche ryalle,
Þer Dauid dere watȝ dyȝt on trone,
Bot by þyse holteȝ hit con not hone,
Bot in Judee hit is, þat noble note.
As ȝe ar maskeleȝ vnder mone,
Your woneȝ schulde be wythouten mote.
Page  34
'Þys moteleȝ meyny þou coneȝ of mele,
Of þousandeȝ þryȝt so gret a route,
A gret ceté, for ȝe arn fele,
Yow byhod haue, wythouten doute.
So cumly a pakke of joly juele
Wer euel don schulde lyȝ þeroute,
And by þyse bonkeȝ þer I con gele
I se no bygyng nawhere aboute.
I trowe alone ȝe lenge and loute
To loke on þe glory of þys gracious gote.
If þou hatȝ oþer bygyngeȝ stoute,
Now tech me to þat myry mote.'
[folio 52r]
'That mote þou meneȝ in Judy londe',
Þat specyal spyce þen to me spakk,
'Þat is þe cyté þat þe Lombe con fonde
To soffer inne sor for maneȝ sake,
Þe olde Jerusalem to vnderstonde;
For þere þe olde gulte watȝ don to slake.
Bot þe nwe, þat lyȝt of Godeȝ sonde,
Þe apostel in Apocalyppce in theme con take.
Þe Lompe þer wythouten spotteȝ blake
Hatȝ feryed þyder hys fayre flote;
And as hys flok is wythouten flake,
So is hys mote wythouten moote.
'Of motes two to carpe clene,
And Jerusalem hyȝt boþe nawþeles —
Þat nys to yow no more to mene
Bot "ceté of God", oþer "syȝt of pes":
In þat on oure pes watȝ mad at ene;
Wyth payne to suffer þe Lombe hit chese;
Page  35
In þat oþer is noȝt bot pes to glene
Þat ay schal laste wythouten reles.
Þat is þe borȝ þat we to pres
Fro þat oure flesch be layd to rote,
Þer glory and blysse schal euer encres
To þe meyny þat is wythouten mote.'
'Moteleȝ may so meke and mylde',
Þen sayde I to þat lufly flor,
'Bryng me to þat bygly bylde
And let me se þy blysful bor.'
Þat schene sayde: 'Þat God wyl schylde;
Þou may not enter wythinne hys tor,
Bot of þe Lombe I haue þe aquylde
For a syȝt þerof þurȝ gret fauor.
Vtwyth to se þat clene cloystor
Þou may, bot inwyth not a fote;
To strech in þe strete þou hatȝ no vygour,
Bot þou wer clene wythouten mote.