TO JOHN PASTON I 1465, 09, 27
to hys ryght worschypful fadre John Paston, beyng in the Flete at London, be thys delyueryd.
Ryght worschypful syre, jn the most lowly wyse I recomand me to yow Pleasyth it yow to wete þat i sente yow a letter but late agoo, in whych letter I lete yow haue vnderstondyng þat, if it pleasyd yow to grante and assente there-to, Syre Thomas Howes wolde resyngne the benefyce of Mawteby to a ful prestly man of Norwych callyd Syr Thomas Lyndys, whom I suppose ye haue knolech of. Neuerthe-lesse I wote wele he hath not ben grettly aquentyd wyth yow. But I and he haue ben moch aquentyd to-gedere, and I vnderstond and knowe hys vertews leuyng and dysposicion ryght wele, whyche herafftere I wote wele scholde please yow ryght wele. And that letter whyche I sente yow, as I vnderstod syns, Nycholas Colman the berere ther-of cam not owte of Norwych iiij or v dayes aftere that the bylle was delyueryd hym, whefor I am jn dowte whythere it is come to yowre handes or not, whyche cawsyth me to wryght to yow ageyn jn thys wyse; besechyng yow, if it plese yow þat the seyd Syr Thomas Lyndys schal be of yowre promotyng jn þe wyse above wretyn, þat then it lyke yow þat I may haue answere by the berere herof, whych schal tary at London a day or ij and not passyng. Nomore to yow at thys tyme, but Alle-myghty God haue yow in guydyng. Wretyn at Heylesdon the Fryday next byfore Sceynt Mychell. By yowre oldere son John Paston