DECLARATION CONCERNING THE FASTOLF ESTATE 1471, 02, 12

To alle Cristen people whom this present writing shal come vnto John Paston, knyght, sendeth greting in our Lord God euerlasting. Where it is so that certein agrementes and accordes beth had betwene the right reuerend fader in God, William, Bisshop of Winchestre, on the oon part, and me the seid J. Paston on the other part, of the maners, lordshippes, londes, tenementes, possessions, and hereditamentes which sumtyme wer of J. Fastolf, knyght, as in endentures therof betwene vs made may appier; where also sithen the making of the same indentures iugement hath be yoven for me ayenst W. Yeluerton, knyght, in the Kynges Chauncerie vpon a bille sued by me in the same Chauncerie ayenst the seid W. Yeluerton and W. Genney, serieant; and ouer this where the seid reuerend fader hath sued ayenst W. Paston, vncle of me the seid J. Paston, a writte sub pena in the seid Chauncerie; know ye me the seid John Paston, knyght, feithfully to promytte and graunt by thiez presentes and bynd me by the order of knyghthode and myn honesté as ferforth and as straitly as I can to parfourme and fulfille on my behalf alle and euerich of the appointementes made betwene the seid reuerend fader and me natwithstonding the seid iugement, suytes, or any other cause or occasion what so euer it be. In witnesse wherof I haue vnto thies presentes put my seale xij day of February the xlix yer of the regne of our souerain lord King Henry the vjthe.