Available at URL http://www.hti.umich.edu/c/cme/
This text has been made available through the Oxford Text Archive for personal scholarly use only. OTA number: U-1685-C
To my ryght wyrshypfull mayster John Paston the oldest be þis delyueryd in haste.
I recomaund me, &c. Yf it pleasyd you I wold ryght fayn that John Jenney werre putt ovte of the comyssyon of the peas and that my brothere Wyll Lumner were set yn
in hys stede, for me thinkyth it were ryght necessere that there were such a won in that countray that oght you gode wyll, and I knowe verely he owyth you ryght gode wyll. He was wyth me at Castere but late. Yf there be made any labour for Doctour Alyn to be justice of the peas, I pray you for Godys sake let it be lettyd yf ye may, for he wyll take to moch apon hym yf he werre. I woldnot that he were remembyrd of youre parte but yf he be spokyn of of othere partys. He ys ryght grete wyth Maister Phylyp Lypȝate and the baylyff of Cosshay. Yf it please yow to wyte that Wykys dyde a-reste on Wyll Bylmyn of Norwych, as Pampyng can enforme you of, for sertyn harnys wych he delyueryd hym at Newcastell for to cary to Yarmoth by watere and there to delyuer it to hym a-yen, whych harnys he kypt styll and may not be delyueryd; and now ther ys com down an habeas corpus for hym, and most appyre at the Comyn Place on Fryday next comyng. Wher-fore yf it pleased you that there myght be taken an accyon in Wykys name of trespas, vndere such forme as there may be a capias a-wardyd a-yenst hys comyng, for aftere that he was arestyd he dyde Dabeney to be arestyd for mayntenyng. And as for the harnys, Wykys delyueryd it to hym the x day of Januare the ij yere of Kyng E. in Pylgryme Strete at Newcastell:
in primis, a payre brygandyrs, a salet, a bore spere, a bawe, xviij arwys, ij payre polrondys, a standerd of mayle, a payre slyvys of plate to the valew of v marc. And, at the reuerens of God, slowth not youre maters nowe, and make an yend of hem other puruey you to make hym or to marre hem in haste, for thys ys to orybyll a coste and trobell that ye haue and haue had for to endure any whyle, and it ys grete heuenys to youre frendys and welwyllers, and grete joy and confort to youre ennemyes. My lord of Norwych seyd to me that he wold not ha byden the sorow and trobell that ye haue a-byden to wyn all Ser John Fastolf ys gode. And God be your spyde in all yore maters. Wryten at Haylesdon the xiij day of May. Youre M. P. I thynk ryght long to hyre tydyngys tyll I haue tydyngys from you.