Available at URL http://www.hti.umich.edu/c/cme/
This text has been made available through the Oxford Text Archive for personal scholarly use only. OTA number: U-1685-C
To the right worshipffull Ser John Paston, knyght, in haste.
Right welbeloued son, I grete yow wele and sende you Godes blissyng and myn, desiryng to knowe how ye do and how ye fare. I mervell moche I here no word from you in writyng sith the letter I sent you be Symme weche he delyuerd you at London, wherin I sent you word that I desired
to knowe how ye wold that I, and other weche ye wold, shulde do for you here bothe for your liflode and for other thynges and also for the mater be-twix your vncle and you, and also be-twix yow and other folkes; for, as God defende, and ought come to you but weele nowther I nor non other that I knowe þat owyth yow wery goode wille wot not in what cace ye stonde nor how ye wold it shulde be dalte wyth, nouther in lyfelode nor in othyr thynges, weche is ryght hevy to me for to remembre concederyng the viage weche ye be in nough at this tyme. I send to Spoorle to your fermour for Midsomer pay last pasd, and he sende me word that Tounesend wold haue it and charged your fermour to pay hym, and ell he wold swe hes obligacion. I wend ye had ben through wyth Tounesend in all thynges savyng for the c marke weche ye borewed of hym last. And as for Sneylewell, I vndrestonde not who deleth for you there, wherof I merwelle. And asfor suche money as I haue receyued of yours, non but for the wode at Sporle xx li., and of Pecok for your lyfelode in Flegge ix li. xv s. iij d., nor no more is like to haue this yere, as he telleth me, but for xx quarter barly be-cauce of suche charges as hath be leide vpon your lond this yere, as he sethe.
Item, on the Sonday next after Sein Jamys William Jenney come to Filby and entred in-to Holme Halle londes, seyng that he entred in the ryght and titell of his douterlawe weche was Boys doughter, and there openly made the tenauntes to retourne be j d. and charged them that they shulde not pay no money nor no dewtés longyng to þat londe but only to hym or his son or suche as they wol assigne, and he to saue them harmeles a-yen you and all other. Wherfore I requere and prey you, as hastely as ye godely may, for my hertes eace to sende me worde how ye and your brethern fare, and how ye spede in your viages, and a knowelege how ye wold that I and other shulde dele for you in thes maters a-boue wreten, ar in any other that ye thynke shuld be profitable for you; and þat I may do I wol do aswele as I can. And as for tidynges here in this contré, we haue non but that the contry is bareyn of money and þat my lady of Yorke and all her howsold is here at Sein Benettes and purposed to a-bide there stille til the Kynge come from be-yonde the see, and lenger if she like the eyre ther, as it is seide. I thynke ryght longe tille I here som tidynges fro you and from your brethern. I prey God sende you and al your company goode spede in your journayes to his plesure, to your worshippes and profightes. Wreten at Mauteby on Sein Laverens Even the xv yere of the regne of Kyng E. the iiijth. Be your moder