Paston letters and papers of the fifteenth century, Part I
Paston family
Norman Davis

TO MARGARET PASTON 1471, 04, 30

Aftyr humbyll and most dew recomendacyon, jn as humbyll wyse as I can I beseche yow of your blyssyng, preying God to reward yow wyth as myche plesyer and hertys ease as I haue latward causyd you to haue trowbyll and thowght. And wyth Godys grace it shall not be longe to or then my wrongys and othyr menys shall be redressyd, for the world was neuyr so lyek to be owyrs as it is now; werfor I prey yow let Lomnor not [deleted in MS] be to besy as yet. Modyr, I beseche yow, and ye may spare eny money, þat ye wyll do your almesse on me and send me some in as hasty wyse as is possybyll, for by my trowthe my lechecrafte and fesyk, and rewardys to them that haue kept me and condyt me to London, hathe cost me sythe Estern Day more then v li. And now I haue neythyr met, drink, clothys, lechecraft, nor money but vp-on borowyng, and I haue asayid my frendys so ferre that they be-gyn to fayle now in my gretest ned that euyr I was in. Also, modyr, I beseche yow, and my horse þat was at lechecraft at the Holt be not takyn vp for the Kyngys hawkys, that he may be had hom and kept in your plase, and not to go owght to watyr nor no whedyr ellys, but that the gat be shet and he to be chasyd aftyr watyr wyth-in your plase, and that he haue as myche met as he may ete. I haue hey j-now of myn owne, and as for otys, Dollys wyll puruey for hym, or who that dothe it I wyll paye. And I beseche yow þat he haue euery wek iij boshell of otys, and euery day a peny worthe of bred. And if Boton be not at Norwyche and Syme kep hym I shall geue hym well for hys labore. Also þat Phelypp Loueday put the othyr horse to gresse ther as he and I wer acordyd.
Item, that Boton send me hyddyr the two shyrtys that wer in my casket, and þat he send me hydyr xl s. by the next messenger þat comyth to London. Page  566
Item, that Mastress Broom send me hedyr iij longe gownys and ij doblettys, and a jaket of plonket chamlett, and a morey bonet owt of my cofyr=Syr Jamys hathe the key = as I sent hyr word be-for thys.
Item, that syche othyr wryghtyngys and stuff as was in my kasket be in your kepyng, and þat no body look my wryghtyngys.
Item, that the horse þat Purdy hathe of myne be put to some good gresse in hast. And if it plese yow to haue knowlage of ouyr royall person, I thank God I am hole of my syknesse, and trust to be clene hole of all my hurttys wythin a seuennyght at the ferthest, by wyche tym I trust to haue othyr tydyngys. And those tydyngys onys had, I tryst not to be longe owght of Norffolk, wyth Godys grace, whom I beseche preserue yow and your for my part. Wretyn þe last day of Apryll. The berer her-of can tell you tydyngys syche as be trew for very serteyn. Your humbylest seruaunt J. of Gelston