TO JOHN PASTON II 1470, 06, 25
To Syr John Paston, knyght, or to Thomas Stomppys to delyuer to the seyd + Syr John.
As I sent yow woord by a lettyr that John Wymondham browght to London, J. Pampyng is endyghtyd of felony, and Edmund Broom as principallys, and ye as axcessary, for schotyng of a gonne in Awgust last past, whyche gonne kyllyd ij men; and I trowe that my lord of Norffolkys consayll wyll make on of the wedows, or bothe, to swe an apell vp-on the same endyghtment thys terme. Wherfor I pray yow se well to thys mater, that when it is sertyfyid in-to the Kyngys Benche, Broom and Pampyng may haue warnyng that they may puruey for hem-self if ther com eny capyas owght for hem. Townysend can tell yow all the mater. Also ye must in eny wyse be ware, for my grauntdam and myn Lady Anne and myn oncyll Wylliam shall be at London wyth-in thes viij or x dayis, and I wot well it is for nowght ellys but to make myn oncyll William swyr of hyr lond. Notwythstandyng, she hath reryd a fyn of it be-for Goodreed the justyse in my grauntfadyrs dayis, and my modyr tellyth me that ye haue the copye of the same fyne. I wold auyse yow to haue it redy, what so euyr betyd. I trow they wyll be the more besy abowght the same mater be-cause they thynk that ye dar not com in London nor at Westmestyr to lett them. But if so be þat ye haue not the copy of the same fynne, look that ye spare for no cost to do serche for itt, for it wyll stand yow on hand, I feell by the werkyng. Thys day seuennyght I trust to God to be forward to Caunterbery at the ferthest, and vp-on Saterday com seuennyght I tryst to be in London, wherfor I pray yow leue woord at yowyr plase in Fleetstrett wher I shall fynd yow, for I purpose not to be seyn in London tyll I haue spook wyth yow. I pray yow remembyr thes maters, for all is doon to make yow to drawe to an end wyth thes lordys that haue your lond fro yow. No more, but I pray God send yow your herttys desyir in thees maters and in all othyr. Wretyn at Norwyche the Monday next aftyr Seynt John Baptyst. J. P.