Le Morte Darthur
Syr Thomas Malory
William Caxton, H. Oskar Sommer

¶ Capitulum Quintum

ANd thenne mounted vpon his hors / and rode in to a forest / and helde no hyhe waye / And as he loked afore hym / he sawe a fayre playne / and besyde that a fayre Castel / & afore the Castel were many pauelions of sylke & of dyuerse hewe / And hym semed that he sawe there fyue honderd knyȝtes rydynge on horsbak / and there were two partyes / they that were of the Castel were all in blak horses and their trappours blak / and they that were withoute were al on whyte horses & trappours / and eueryche hurteled to other that it merueylled syr launcelot / And at the laste hym thoughte they of the castel were putte to the werse / Thenne thoughte sir launcelot for to helpe there the weyker party in encrecynge of his chyualry And soo syr launcelot threst in among the party of the Castel and smote doune a knyghte hors and man to the erthe / And thenne he rasshed here and there and dyd merueyllous dedes of armes / And thenne he drewe oute his suerd / and strake many knyghtes to the erthe / so that alle tho that sawe hym merueylled that euer one knyghte myghte doo soo grete dedes of armes / But alweyes the whyte knyghtes helde them nyghe aboute syr launcelot for to tyere hym and wynde hym / But att the laste as a man may not euer endure syre Launcelot waxed so faynt of fyȝtyng & trauaillyng & was so wery Page  662 [leaf 331v] of his grete dedes / but he myghte not lyfte vp his armes for to gyue one stroke so that he wende neuer to haue borne armes / & thenne they alle took and ledde hym awey in to a forest / and there made hym to alyghte & to reste hym / And thenne all the felaushyp of the castel were ouercome for the defaute of hym / Thenne they sayd alle vnto syr launcelot blessid be god / that ye be now of oure felaushyp / for we shalle holde yow in oure pryson / and soo they lefte hym with fewe wordes / And thenne syr launcelot made grete sorowe / for neuer or now was I neuer at turnement nor Iustes but I had the best / and now I am shamed / and thenne he sayd now I am sure that I am more synfuller than euer I was / thus he rode sorowynge / and half a day he was oute of despayre / tyl that he came in to a depe valey / And whanne syr launcelot sawe he myghte not ryde vp in to the montayne / he there alyghte vnder an Appel tree / and there he lefte his helme and his shelde / and put his hors vnto pasture / And then he leid hym doune to slepe / And thenne hym thoughte there came an old man afore hym / the whiche sayd A launcelot of euylle feythe and poure byleue / wherfor is thy wille tourned soo lyghtely toward thy dedely synne / And whanne he had sayd thus / he vanysshed away / & launcelot wyst not where he was become / Thenne he tooke his hors and armed hym / And as he rode by the way he sawe a chappel where was a recluse whiche hadde a wyndowe that she myghte see vp to the Aulter / And alle aloude she called launcelot / for that he semed a knyghte erraunt / And thenne he came and she asked hym what he was / and of what place / & where aboute he wente to seke