¶ Capitulum ij
ALso Merlyn made the round table in tokenyng of roundenes of the world / for by the round table is the world sygnefyed by ryghte / For al the world crysten and hethen repayren vnto the round table / And whan they are chosen to be of the felauship of the roūd table / they thynke hem more blessid & more in worship than yf they had goten halfe the world / and ye haue sene that they haue loste her faders & her moders and alle her kynne and her wyues and her children for to be of your felauship / It is wel sene by yow / For syns ye departed fro your moder / ye wold neuer see her ye fond suche felauship at the roūd table / whan Merlyn had ordeyned the round table he said by them which shold be felawes of the round table / the trouth of the Sancgreal shold be wel knowen and men asked hym how men myghte knowe them that sholde best do and to encheue the Sancgreal / thenne he said ther shold be thre whyte bulles that shold encheue hit / and the two sholde be maydens / and the thyrd shold be chast / And that one of the thre shold passe his fader as moche as the lyon passeth the lybard bothe of strengthe and hardynes