Capitulum Octauum /
ANd ther with the teres fylle in his eyen / And thenne he sayd Gawayne Gawayne ye haue sette me in grete sorowe / For I haue grete doubte that my true felauship shalle never mete here more ageyne / A sayd syr Launcelot comforte your self / for hit shalle be vnto vs a grete honour & moche more than yf we dyed in ony other places / for of deth we be syker / A laūcelot said þe kyng þe grete loue þt I haue had vnto you al the dayes of my lyf maketh me to say suche dolefull wordes / for neuer Crysten kynge had neuer soo many worthy men at this table as I haue had this daye at the round table and that is my grete sorowe /
¶ Whanne the Quene ladyes & gentilwymmen wyst these tydynges / they had suche sorowe & heuynesse that ther myght no tonge telle hit / for tho knyghtes had hold them in honour and chyerte / But amonge all othther Quene Gueneuer made grete sorowe / I merueylle said she my lord wold suffre hem to departe from hym / thus was al the Courte troubled for the loue of the departycyon of tho knyghtes / And many of tho ladyes that loued knyghtes wold haue gone with her louers / and soo had they done had not an old knyghte come amonge them in Relygyous clothyng / and thenne he spake alle on hyghe / and said fayre Lordes which haue sworn in the quest of the Sancgreal / Thus sendeth you nacyen the heremyte word that none in this queste lede lady nor gentylwoman with hym / for hit is not to doo in so hyghe a seruyfe as they labour in / for I warne yow playne he that is not clene of his synnes / he shalle not see the mysteryes of our lord