Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang

¶ Capitulum lxxviij

ANd there with alle two knyghtes armed cam vnto the pauelione / and there they alyghte bothe / and came in armed at alle pyeces / Faire knyghtes sayd syre Tristram / ye ar to blame to come thus armed at alle pyeces vpon me whyle we ar at oure mete / yf ye wold ony thynge whan we were in the felde / there myghte ye haue easyd your hertes / Not so said the one of tho knyghtes we come not for that entent / But wete ye wel sir Tristram we be come hydder as your frendes / And I am come here said the one for to see yow & thys knyghte is come for to see la Beale Isoud / Thenne said sire Tristram I requyre yow doo of your helmes that I maye see yow / that wille we doo at your desyre the knyghtes / And whanne their helmes were of / sir Tristram thought that he shold knowe them / Thenne said sir Dynadan pryuely vnto syr Tristram / syr that is sire Launcelot du lake that spak vnto yow fyrst / and the other is my lord Kynge Arthur / Thenne said sir Tristram vnto la Beale Isoud Madame aryse for here is my lord kynge Arthur / thenne the kynge and the quene kyssed and sire launcelot and syr Tristram braced eyther other in armes / and thenne there was Ioye withoute mesure / & at the request of la Beale Isoud kynge Arthur and Launcelot were vnarmed / and thenne there was mery talkynge

¶ Madame said sire Arthur hit is many a day sythen that I haue desyred to see yow / for ye haue ben praysed soo ferre / and now I dar say ye are the fayrest that euer I sawe / & sir Tristram is as fayre and as good a knyghte as ony that I knowe / therfor me besemeth ye are wel besett to gyders / Syr god thanke yow said the noble knyȝt sire Tristram and Isoud / of your grete goodenesse & largesse ye ar pyerles / Thus

[leaf 276v] they talked of many thynges and of alle the hole Iustes / But for what cause sayd kynge Arthur were ye sir Tristram ageynst vs / ye are a knyght of the table round / of ryghte ye shold haue ben with vs / Syre said sir Tristram here is Dynadan and sire Gareth your owne neuewe caused me to be ayenst yow / My lord Arthur sayd Gareth I may wel bere the blame but it were sir Tristrams owne dedes / That may I repente sayd Dynadan / for this vnhappy sire Tristram broughte vs to haue this turnement / and many grete buffets he caused vs to haue Thenne the kynge and launcelot lough that they myghte not sytte / what knyght was that sayd Arthur that held yow soo short / this with the sheld of syluer / Syr said sir Tristram here he sytteth at this bord / what said Arthur was hit sire Palomydes / wete ye wel hit was he said la Beale Isoud /

¶ So god me help said Arthur that was vnknyghtely done of you of soo good a Knyghte / for I haue herd many peple calle you a curtois knyghte / Sir said Palomydes I knewe not sir Tristram / for he was soo desguysed / Soo god me helpe sayd launcelot it maye wel be / for I knewe not sir Tristram / But I merueyle why ye torned on oure party / That was done for the same cause said launcelot / As for that said sir Tristram I haue pardonned hym / and I wold be ryght lothe to leue his felauship / for I loue ryght wel his company / soo they lefte of and talked of other thynges / And in the euenynge kyng arthur and sir launcelot departed vnto their lodgynge / but wete ye wel sir Palomydes had enuy hertely for alle that nyght he had neuer rest in his bedde / but wayled and wepte oute of mesure / Soo on the morn sire Tristram Gareth and Dynadan arose erly / and thenne they wente vnto sire Palomydes chamber / and there they fond hym fast on slepe / for he had al nyȝt watched / And it was seene vpon his chekes that he had wept ful sore / Say no thynge said syr Tristram / for I am sure he hath taken anger and sorowe for the rebuke that I gaf to hym and la Beale Isoud