Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang

¶ Capitulum lij

THenne la Beale Isoud and sire Tristram took their vessel / and came by water in to this land / and so they were not in this land four dayes / but there came a crye of a Iustes and turnement that Kynge Arthur lete make / Whanne sire Tristram herd telle of that turnement he desguysed hym self / and la Beale Isoud / and rode vnto that turnement And whan he came there he sawe many Knyghtes Iuste and turneye / and so syr Tristram dressid hym to the raunge / and to make short conclusion / he ouerthrewe fourten Knyghtes of the round table / Whanne sir Launcelot sawe these Knyghtes thus ouerthrowen / sire launcelot dressid hym to sir Tristram / That sawe la Beale Isoud how sire launcelot was come in to the felde /

¶ Thenne la Beale Isoud sente vnto sire Launcelot a rynge / and badde hym wete that it was sir Tristram de lyones Whanne sir launcelot vnderstood that there was syre Tristram he was ful gladde / and wold not Iuste / thēne sire Launcelot

[leaf 250r] aspyed whyder syre Tristram yede / and after hym he rode / and thenne eyther made of other grete Ioye / And soo sire Launcelot broughte sire Tristram and la beale Isoud vnto Ioyous gard that was his owne Castel that he had wonne with his owne handes / And there sire Launcelot put them in to welde for their owne / And wete ye wel that Castel was garnysshed and furnysshed for a Kynge and a quene Royal there to haue soiourned / and syre Launcelot charged alle his people to honoure them and loue them as they wold doo hym self /

¶ Soo sire launcelot departed vnto kynge Arthur / and thenne he told Quene Gueneuer how he that Iusted soo wel atte last turnement was sire Tristram / and there he told her how he hadde with hym la beale Isoud maulgre kynge Marke / & soo Quene Gueneuer told alle this vnto kynge Arthur /

¶ Whanne kynge Arthur wyste that sire Tristram was escaped and comen from kynge Marke / and had broughte la beale Isoud with hym / thenne was he passynge gladde / So by cause of sire Tristram kynge Arthur lete make a crye / that on may day shold be a Iustes before the castel of Lonaȝep / And that Castel was fast by Ioyous gard / And thus Arthur deuysed that alle the knyghtes of this land and of Cornewaile and of Northwalys shold Iuste ageynste all these countreyes / Irland / Scotland / and the remenaunt of walys & the countrey of Gore and Surluse and of Lystynoyse / & they of Northumberland and alle they that helde landes of arthur a this half the see / whanne this crye was made / many knyghtes were gladde and many were vngladde /

¶ Syre said laūcelot vnto Arthur by this crye that ye haue made ye wyll put vs that ben aboute yow in grete Ieopardy / for there be many Knyghtes that haue grete enuye to vs / therfore whan we shal mete at the daye of Iustes there wille be hard skyfte amonge vs / As for that said Arthur I care not / there shal we preue who shal be best of his handes / Soo whan sir launcelot vnderstode wherfore kynge Arthur made this Iustyng thēne he made suche purueaunce that la beale Isoud shold behold the Iustes in a secrete place that was honest for her estate /

¶ Now torne we vnto sire Tristram and to la beale Isoud / how they maade grete Ioye dayly to gyders with alle manere

[leaf 250v] of myrthes that they coud deuyse / and in euery day sir Tristram wold goo ryde on huntynge / for sire Tristram was that tyme called the best chacer of the world / and the noblest blower of an horne of alle manere of mesures / for as bookes reporte / of syre Tristram came alle the good termes of venery and of hūtynge and alle the syses and mesures of blowynge of an horne / and of hym we had fyrste alle the termes of haukyng / & whiche were beestes of chace beestes of venery / and whiche were vermyns / and alle the blastes that longen to all manner of gamen / Fyrste to the vncoupelynge / to the sekynge / to the rechate / to the flyghte / to the dethe / and to strake / and many other blastes and termes / that all maner of gentylmen haue cause to the worldes ende to preyse sir Tristram and to praye for his soule