Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang

[leaf 226r]

¶ Capitulum xxiij

NOw torne we ageyne vnto sire Lamorak / and speke we of his bretheren / syr Tor whiche was kynge Pellenors fyrst sone and bygoten of Aryes wyf the couherd for he was a bastard and sire Aglouale was his fyrste sone begoten in wedlok / syre Lamorak / Dornar / Percyuale / these were his sones to in wedlok /

¶ Soo whanne kynge Marke and sire Tristram were departed from the Courte / there was made grete dole and sorowe for the departynge of sir Tristram Thenne the kynge and his knyghtes made no manere of Ioyes eyghte dayes after / And atte eyghte dayes ende ther cam to the courte a knyghte with a yonge squyer with hym / And whanne this knyghtes was vnarmed / he went to the kynge and requyred hym to make the yonge squyer a knyghte / Of what lygnage is he come said Kynge Arthur / Syre sayd the knyght he is the sone of kyng Pellenore that dyd you somtyme good seruyse / And he is broder vnto syr Lamorak de galys the good knyght / wel sayd the kynge for what cause desyre ye that of me that I shold make hym knyghte / wete you wel my lord the Kynge that this yonge squyer is broder to me as wel as to sir Lamorak / and my name is Aglauale Syre Aglouale sayd Arthur for the loue of sire Lamorak and for his faders loue he shalle be made knyghte to morowe /

¶ Now telle me said Arthur what is his name / Syre sayd the Knyght his name is Percyuale de Galys / Soo on the morne the kynge made hym knyght in Camelott / But the Kynge and alle the knyghtes thoughte hit wold be longe or that he preued a good knyghte

¶ Thenne at the dyner whanne the Kynge was set at the table / and euery knyȝt after he was of prowesse / the kyng commaunded hym to be sette amonge meane Knyghtes / and soo was sire Percyuale sette as the Kyng commaunded / Thenne was there a mayden in the Quenes court that was come of hyhe blood / & she was domme & neuer spak word / Ryght so she cam streyght in to the halle / & went vnto sir Percyuale & toke hym by þ^e hād & said

[leaf 226v] alowde that the kyng and all the knyghtes myght here hit / Aryse syr Percyuale the noble Knyght and goddes knyght and go with me / and soo he dyd / And there she broughte hym to the ryght syde of the sege perillous / And said Fair knyghte take here thy sege / for that sege apperteyneth to the and to none other / Ryght soo she departed and asked a preste / And as she was confessid and houseld thenne she dyed / Thenne the kynge and alle the courte made grete ioye of syr Percyuale