Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang
About this Item
Title
Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang
Author
Malory, Thomas, Sir, 15th cent.
Editor
Caxton, William, ca. 1422-1491, Sommer, H. Oskar (Heinrich Oskar), b. 1861
Publication
London: David Nutt
1889
Rights/Permissions
The University of Michigan Library provides access to these materials for educational and research purposes. These materials are in the public domain. If you have questions about the collection, please contact mec-info@umich.edu. If you have concerns about the inclusion of an item in this collection, please contact libraryit-info@umich.edu.
"Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang." In the digital collection Corpus of Middle English Prose and Verse. https://name.umdl.umich.edu/MaloryWks2. University of Michigan Library Digital Collections. Accessed May 23, 2024.
Pages
¶ Capitulum xx
NOw torne we ageyne / whan sire Gaynys and sir
brandyles with his felawes came to the Courte of kyng
Arthur / they told the kynge / syr Launcelot and sir Tristram /
how sire Dagonet the foole chaced Kynge Marke thurgh the
forest / and how the stronge knyght smote them doune al seuen
with one spere / There was grete laughynge and Iapynge atte
Kynge Marke and at sire Dagonet / But all these knyghtes
coude not telle what knyȝt it was that rescowed kyng mark
Thenne they asked kynge Marke yf that he knewe hym / and
he ansuerd and said / he named hym self the Kynght that
folowed the questynge beest / and on that name he sente one of
my varlets to a place where was his moder / and when she herd
from whens he cam / she made passyng grete dole and discouerd
to my varlet his name and said / O my dere sone sire
Palomydes why wolt thou not see me / and therfor syr said kyng
mark it is to vnderstande his name is sir Palomydes a noble
knyght / Thenne were alle these seuen knyghtes gladde that they
knewe his name /
¶ Now torne we ageyne / for on the morne
they toke their horses bothe sir Lamorak / Palomydes Dynadā
with their squyers and varlets tyl they sawe a fayre castel /
that stood on a montayne wel closed / and thyder they rode
and there they fond a knyght that hyght Galahalt that was
lord of that castel / and there they had grete chere and were
wel eased / Syr Dynadan said sire Lamorak what wil ye doo
descriptionPage 446
[leaf 223v]
sir said Dynadan / I wylle to morowe to the courte of kynge
Arthur /
¶ But my hede said sir Palomydes I wille not ryde
these thre dayes / for I am sore hurte / and moche haue I bled
And therfor I wille repose me here / Truly said sir Lamorak /
and I wille abyde here with you / And whan ye ryde / thenne
wille I ryde / onles that ye tary ouer longe / Thenne wyll I
take myn hors / therfor I pray you syr Dynadan abyde and
ryde with vs / Feythfully said Dynadan I wylle not abyde for
I haue suche a talent to see sir Tristram that I may not abyde
longe from hym / / A Dynadan said syre Palomydes now do I
vnderstande / that ye loue my mortal enemy / and therfore how
shold I trust yow / wel said Dynadan I loue my lord syre
Tristram aboue all other / and hym wille I serue and do
honoure / So shalle I said syre Lamorak in al that may lye in
my power / Soo on the morne sir Dynadan rode vnto the court
of kynge Arthur / And by the way as he rode he sawe where
stoode an erraunt Knyght / and made hym redy for to Iuste /
Not soo said Dynadan for I haue no wylle to Iuste / with me
shalle ye Iuste said knyght or that ye passe this waye /
Whether aske ye Iustes by loue or by hate / the knyght ansuerd
wete ye wel / I aske hit for loue & and not hate / hit maye wel
be soo said syre Dynadan / but ye profer me hard loue / whan ye
wylle Iuste with me a sharp spere / But fayre knyghte
sayd syre Dynadan sythe ye wylle Iuste with me / mete wyth
me in the Courte of Kynge Arthur / and there shalle I Iuste
with you / Wel said the Knyght sythe ye wille not Iuste with
me I pray yow telle me your name /
¶ Syr
knyght said he my name is syre Dynadan / A said the Knyghte /
ful wel knowe I you for a good knyghte and a gentyl / and
wete yow wel I loue you hertely /
¶ Thenne shalle here be no
Iustes sayd Dynadan betwixe vs / Soo they departed / And
the same day he came to Camelot where lay Kynge Arthur /
And there he salewed the Kynge and the quene / syre
Launcelot and syre Tristram / and alle the Courte was gladde of sir
Dynadan / for he was gentyl wyse and curteys / and a good
Knyghte / And in especyal the valyaunt Knyght sir Tristram
loued syre Dynadan passyng wel aboue alle other knyghtes
sauf sir launcelot
¶ Thenne the kynge asked
descriptionPage 447
[leaf 224r]
syr Dynadan what aduentures he had sene / Sire said
Dynadan I haue sene many aduentures / and of somme kyng mark
knoweth / but not alle / Thenne the Kynge herkened syr
Dynanadan how he told sir Palomydes and he were afore the
castel of Morgan le fay / and how syr Lamorak toke the
Iustes afore them / and how he foriusted twelue Knyghtes / and
of them four he slewe / And how after he smote doune sir
Palomydes and me bothe / I may not byleue that sayd the kynge
For sir Palomydes is a passyng good knyghte / that is very
trouthe said sir Dynadan / but yet I sawe hym better preued
hand for hand / And thenne he told the kyng alle that batail
And how sir Palomydes was more weyker and more hurte /
and more lost of his blood / And withoute doubte sayd sir
dynadan had the bataille lenger lasted / palomydes had be slayn
O Ihesu said Kynge Arthur this is to me a grete merueylle
Syr said Tristram merueylle ye no thynge therof / for at myn
aduys / there is not a valyaunter knyghte in the world
lyuynge / for I knowe his myght / And now I wille saye yow
I was neuer soo wery of knyghte but yf it were sir launcelot
And there is no knyghte in the world excepte syr Launcelot
I wold dyd soo wel as sir Lamorak / Soo god me help
said the kyng I wold that knyght syre Lamorak came to thys
Courte / syr said Dynadan he wille be here in shorte space / and
syr Palomydes bothe / but I fere that Palomydes may not yet
trauayle
email
Do you have questions about this content? Need to report a problem?
Please contact us.