Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang
About this Item
Title
Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang
Author
Malory, Thomas, Sir, 15th cent.
Editor
Caxton, William, ca. 1422-1491, Sommer, H. Oskar (Heinrich Oskar), b. 1861
Publication
London: David Nutt
1889
Rights/Permissions
The University of Michigan Library provides access to these materials for educational and research purposes. These materials are in the public domain. If you have questions about the collection, please contact mec-info@umich.edu. If you have concerns about the inclusion of an item in this collection, please contact libraryit-info@umich.edu.
"Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang." In the digital collection Corpus of Middle English Prose and Verse. https://name.umdl.umich.edu/MaloryWks2. University of Michigan Library Digital Collections. Accessed May 28, 2024.
Pages
¶ Capitulum xix
THenne Palomydes rode faste tyl he came nyghe hym /
And then̄e he said Knyght remembre ye of the shame
ye dyd to me ryght now at the Castel / therfore dresse the / for
I will haue adoo with the / Fair knyȝt said he to Palomydes
of me ye wynne no worship / for ye haue sene this daye that I
haue ben trauailed sore / As for that said Palomydes I wille
not lete / for wete ye wel I wil be reuenged / wel said the
knyght I may happen to endure you / And there with all he
moūted vpon his hors and took a grete spere in his hand redy for
descriptionPage 444
[leaf 222v]
to Iuste / Nay said palomydes I wille not Iuste / for I am sure
at Iustynge I gete no pryce / Fair knyght said that Knyghte
It wold biseme a knyght to Iuste and fyghte on horsbak
ye shalle see what I wille doo said Palomydes / and therwith
he alyghte doune vpon foote / and dressid his shelde afore hym
and pulled oute his swerd / Thenne the knyghte with the
reed sheld descended doune from his hors / and dressid his sheld
afore hym / and soo he drewe oute his suerd / And thenne they
came to gyders a softe paas / and wonderly they lasshed to
gyders passyng thyck the moūtenaunce of an houre / or euer they
brethed / Thenne they tracyd and trauercyd and waxed
wonderly wrothe / and eyther behyght other dethe / they hewe so fast
with their suerdes that they cutte in doune half theire swerdes /
and mayles that the bare flesshe in some place stode aboue
theyr harneis /
¶ And whan sir Palomydes beheld his felawes
swerd ouer hylled with his blood / hit greued hym sore / some
whyle they fayned / some whyle they strake as wyld men /
But at the last sir Palomydes waxed faynte by cause of his
first wounde that he had atte castel with a spere / for that
wound greued hym wonderly sore / Faire knyght said
Palomydes me semeth we haue assayed eyther other passyng sore / and
yf hit may please the / I requyre the of thy knyghthode telle
me thy name / Sir said the knyȝt to Palomydes / that is me loth
to doo / for thou hast done me wronge / and no knyghthode to
profer me bataille / consyderynge my grete trauaylle /
¶ But and
thou wolt telle me thy name / I wille telle the myn / Syr said
he wete thou wel my name is palomydes / A syr ye shall
vnderstande my name is sir Lamorak de galys / sone and heyre vnto
the good knyghte and kynge / kynge Pellenore / and syr Tor
the good knyght is my half broder / Whanne sire Palomydes
herd hym saye soo he kneled doune and asked mercy for
oultragously haue I done to you this daye / consyderyng the
grete dedes of armes I haue sene you done / shamefully and
vnknyghtely I haue requyred you to doo bataile / A syre
Palomydes said sir Lamorak / ouer moche haue ye done and sayd to
me / And ther with he enbraced hym with his both handes / and
said Palomydes the worthy knyght in alle this land is noo
better than ye nor more of prowesse / and me repentyd sore that
descriptionPage 445
[leaf 223r]
we shold syghte to gyders / So it doth not me said sir
Palomydes / and yet am I sorer wounded than ye ben /
¶ But as for
that I shalle soone therof be hole / But certaynly I wold not
for the fayrest castel in this land / but yf thou and I had met
for I shalle loue you the dayes of my lyfe afore al other
knyghtes excepte my broder sir Safere / I saye the same said syre
Lamorak excepte my broder sir Tor / Thenne came sire
Dynadan / and he made grete ioye of sir Lamorak /
¶ Thenne theire
squyers dressid bothe their sheldes and their harneis / and
stopped their woundes / And there by at a pryory they rested them
alle nyghte /
email
Do you have questions about this content? Need to report a problem?
Please contact us.