Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang

¶ Capitulum x

THenne was Kynge Marke sore ashamed / and sayd but lytyl ageyne / But whanne sir Lamorak and sir Dynadan wyst that he was kynge Marke / they were sory of his felauship / Soo after souper they wente to lodgynge / Soo on the morne they arose erly / and kynge Marke and sir Dynadan rode to gyders / and thre myle fro their lodgynge there met with hem thre knyghtes / and sir Berluse was one / and that other his two cosyns / Syr Berluse sawe kynge Marke / and thenne he cryed on hyghe traytour kepe the from me / for wete thou wel that I am Berluse / Syr knyght said sir Dynadan / I counceylle you to leue of at this tyme / for he is rydynge to Kynge Arthur / And by cause I haue promysed to conduyte hym to my lord kynge Arthur / nedes must I take a part with hym / how be hit I loue not his condycyon / and fayne I wold be from hym / Wel dynadan said sir Berluse me repenteth that ye wille take party with hym / but now doo your best / And thēne he hurtled to Kynge Marke and smote hym sore vpon the shelde / that he bare hym clene out of his sadel to the erthe / That sawe sir Dynadan / and he feutryd his spere / and ranne to one of Berluses felawes / and smote hym doune of his sadel / Thenne Dynadan torned his hors / and smote the thyrdde knyght in the same wyse to the erthe / for sire Dynadan was a good knyght on horsbak / and there byganne a grete batail for Berluse and his felawes helde them to gyders strongly on fote And soo thurgh the grete force of sir Dynadan / kyng Marke had Berluse to the erthe / and his two felawes fledde / and had not ben syre Dynadan kynge Marke wold haue slayne hym / And soo syre Dynadan rescowed hym of his lyf / for kynge Marke was but a murtherer / And thenne they took their horses / and departed / and lefte sir Berluse there sore woūded Thenne kynge Mark and sir Dynadan rode forth a four leges englysshe tyl that they came to a brydge where houed a knyght on horsbak armed and redy to Iuste /

¶ Loo sayd

[leaf 215r] syr Dynadan vnto Kynge Marke / yonder houeth a Knyghte that wille Iuste / for there shalle none passe this brydge / but he must Iuste with that Knyght / Hit is wel said kynge marke for this Iustes falleth with the / Syr Danadan knewe the knyght wel / that he was a noble Knyght / and fayne he wold haue Iusted / but he had had leuer Kyng Mark had Iusted with hym / but by no meane kynge Marke wold not Iuste / Thenne syr Dynadan myght not refuse hym in no maner / And thenne eyther dressid their speres and their sheldes / and smote to gyders soo that thorou fyne force syr Dynadan was smyten to the erthe / and lyghtely he arose vp / and gat his hors / and requyred that Knyght to doo bataille with suerdes / And he ansuerd and said Fair Knyght as at this tyme I may not haue adoo with you nomore / for the customme of this passage is suche / Thenne was sir Dynadan passynge wrothe / that he myȝt not be reuenged of that Knyghte / and soo he departed / and in no wyse wold that Knyght telle his name / But euer sir Dynadan thought he shold knowe hym by his shelde that it shold be sir Tor