Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang

¶ Capitulum xxxvj

THere was an Erle that hyghte Gryp / And this Erle maade grete werre vpon the kynge / and putte the kynge to the werse / and byseged hym / And on a tyme syre kehydyus that was sone to kynge Howel / as he yssued oute / he was sore wounded nyghe to the dethe /

¶ Thenne Gouernaile wente to the kynge and said / syre I counceyle you to desyre my lord syre Tristram as in your nede to helpe you / I wille doo by your counceylle said the kynge / and soo he yede vnto syr Trystram and praid hym in his warris to helpe hym / for my sone kehydyus may not goo in to the felde

¶ Sire said sir Tristram I wille goo to the feld and doo what I maye / Thenne sir Tristram yssued out of the towne with suche felauship as he myght make / and dyd suche dedes that alle Bretayne spake of hym / And thēne at the last by grete myghte and force he slewe the Erle Gryp with his owne handes / and moo than an honderd knyghtes he slewe that daye / And thenne sire Tristram was receyued worshipfully with procession

¶ Thenne kynge Howel enbraced hym in his armes / and said sire Tristram alle my kyngdome I wille resygne to the / God defende said sir Tristram / For I am beholden vnto you for youre doughters sake to doo for you /

¶ Thenne by the grete meanes of kynge Howel & kehydyus his sone by grete profers there grewe grete loue betwixe Isoud and sire Trystram / for that lady was bothe good and fayre / and a woman of noble blood & fame

¶ And for by cause sir Tristram had suche chere and Rychesse and alle other plesaunce that he hadde / all moost he hadde forsaken la beale Isoud / And soo vpon a tyme sir Trystram agreed to wedde Isoud la blaunche maynys / And at the laste they were wedded / and solempnly held theyr maryage / And soo whanne they were abedde bothe / sire Tristram remembryd hym of his old lady la beale Isoud / And thenne he toke suche a thought sodenly that he was alle desmayed / and other chere maade he none but with clyppynge and kyssynge as for other flesshly lustes sire Trystram neuer thoughte nor hadde adoo with her / suche mencyon maketh the frensshe booke

[leaf 165r] Also it maketh mencyon that the lady wende there had ben no pleasyr but kyssynge and clyppynge /

¶ And in the meane tyme there was a knyght in Bretayne his name was Suppynabyles / and he came ouer the see in to Englond / And thenne he came in to the court of kynge Arthur / and he met with sir Launcelot du lake / and told hym of the maryage of syre Tristram / Thenne said sire Launcelot / Fy vpon hym vntrue knyghte to his lady that soo noble a knyghte as sir Trystram is shold be foūde to his fyrst lady fals / la beale Isound / quene of Cornewaile / But saye ye hym this / said sire Launcelot that of alle knyghtes in the world I loued hym moost / and had moost ioye of hym / and alle was for his noble dedes / and lete hym wete the loue bitwene hym and me is done for euer / And that I gyue hym warnyng from this daye forth as his mortal enemy