Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang

¶ Capitulum xxix

ANd anone they were rychely wedded with grete nobley / But euer as the frensshe book sayth sir Trystram and la beale Isoud loued euer to gyders /

¶ Thenne was there grete Iustes and grete torneyenge / and many lordes and ladyes were at that feest / and sir Trystram was most preysed of alle other / thus dured the feest longe / and after the feest was done / within a lytel whyle after by the assent of two ladyes that were with quene Isoud / they ordeyned for hate and enuy for to destroye dame Bragwayne / that was mayden and lady vnto la beale Isoud / and she was sente in to the forest for to fetche herbes / & there she was mette & bounde feete and hand to a tree / and soo she was bounden thre dayes / And by fortune sir Palamydes fond dame Bragwayne / and there he delyuerd her from the dethe / and brought her to a nonnery there besyde for to be recouerd / whanne Isoud the quene myst her mayden / wete ye wel she was ryght heuy as euer was ony quene / for of alle erthely wymmen she loued her best / the cause was for she came with her oute of her countreye / And soo vpon a day quene Isoud walked in to the forest to putte aweye her thoughtes / and ther she wente her self vnto a welle / and made grete mone / and sodenly there came Palamydes to her / and had herd alle her complaynte / and sayd Madame Isoud and ye wille graunte me my bone / I shalle brynge to you dame Bragwayne sauf and sound / And the quene was so glad of his profer / that sodenly vnauysed she graūted alle his askynge / wel madame said Palamydes I trust to your promyse / And yf ye wille abyde here half an houre / I shal brynge her to you / I shall abyde you said la beale Isoud

[leaf 159r] And sir Palamydes rode forth his way to that nonnery / and lyghtly he came ageyne with dame Bragwayne / but by her good wille she wold not haue comen ageyne / by cause for loue of the quene she stood in auēture of her lyf / Notwithstandyng half ageynst her wille she wente with sir Palamydes vnto the quene / And whan the quene sawe her / she was passyng glad Now madame said Palamydes remembre vpon your promyse / for I haue fulfilled my promyse / Sir Palamydes said the quene I wote not what is your desyre / But I wille that ye wete how be it I promysed you largely I thought none euyl nor I warne you none ylle wille I doo / Madame said sir palamydes / as at this tyme ye shalle not knowe my desyre / but bifore my lord your husband there shalle ye knowe that I wil haue my desyre that ye haue promysed me / And therwith the quene departed and rode home to the kynge / and sir palamydes rode after her / And whan syr Palamydes came before the kynge / he said sir kyng I requyre you as ye be a ryghteuous kynge that ye wille Iuge me the ryght / Telle me your cause said the kynge and ye shalle haue ryght /