Layamon's Brut (British Museum Ms. Cotton Caligula A.IX)

Lines 9501 through 9600

and ich me wulle ræsten; to þissere nihte uirste. Line 9501 & alle dai to-mærwe; to blissien mire duȝeðe. Line 9502 Ygærne beh to bure; & lætte bed him makien. Line 9503 wes þat kine-wurðe bed; al mid palle ouer-bræd. Line 9504 Þe king hit wel bihedde; & eode to his bedde. Line 9505 and Ygærne læi adun; bi Uðere Pendragun. Line 9506 Nu wende Ygerne ful iwis; þat hit weoren Gorlois. Line 9507 þurh neuere nænes cunnes þing; no icneou heo Vðer þene king. Line 9508 Þe king hire wende to; swa wapmon sculde to wimmon do. Line 9509 & hæfde him to done; wið leofuest wimmonne. Line 9510 & he streonede hire on; ænne selcuðne mon. Line 9511 kingen alre kenest; þæ æuere com to monnen. Line 9512 & he wes on ærde; Ærður ihaten. Line 9513

Line 9513 Nuste noht Ygerne; wha læie on hire ærme. Line 9514 for æuere heo wende ful iwis; þat it weoren þe eorl Gorlois. Line 9515 Næs þer na mære uirst; buten þat hit wes dæi-liht. Line 9516 þer forð-rihtes; vnderȝeten þa cnihtes. Line 9517 þat þe king wes iuaren; ut of þere uærde. Line 9518 Þa sæiden þa cnihtes; soð þæh hit neoren; Line 9519 þat þe king wes ifloȝen; mid ærhþen afeolled. Line 9520 ah al hit wes lessinge; þat heo seiden bi þan kinge. Line 9521 her-of heo heolden muchel run; uppen V[ð]er Pendragun. Line 9522 Þa seiden þa eorles; & þa hæhste beornes. Line 9523 Nu þenne hit wat Gorlois; hu hit iuaren is. Line 9524 þat ure king is ifaren; & his ferde bilæiued. Line 9525 he wule forð-rihtes; wepni his cnihtes. Line 9526 and ut he wule to fihten; & feollen us to grunden. Line 9527 mid woden his þeines; muchel wæl makien. Line 9528 þenne weore us beteren; þat we iboren neoren. Line 9529 Ah leten we blawen bemen; & bonnien ure uerde. Line 9530 & Cador þe kene; scal beren þas kinges marke. Line 9531 hæbben haȝe þene drake; bi-foren þissere duȝeðe. Line 9532 and faren to þan castle; mid kene ure folke. Line 9533 and þe eorl Aldolf; scal beon ure aldre. Line 9534 & we him scullen here; swulc hit þe king weoren. Line 9535 & swa we s[c]ullen mid rihte; wið Gorlois fihten. Line 9536 and ȝif he us wule speken wið; & ȝernen þis kinges grið. Line 9537 setten sæhtnusse; mid æðen soð-fæste. Line 9538 þenne maȝen we mid wurð-scipen; heonene iwenden. Line 9539 þenne nabbeoð ure æfterlinges; nane up-breidinges. Line 9540 þat we for ærhscipe; heonene at-ærnden. Line 9541 Al þat leodliche folc; bilufde þesne ilke ræd. Line 9542 Bemen heo bleowen. bonneden uærden. Line 9543 up heo hafden þene drake; ælches mærken vnimake. Line 9544 þer wes moni bald scalc; þe sceld weiden on sculdre. Line 9545 moni þein kene; & wenden to þan castle. Line 9546 Gorlois wes wið-innen; mid kene his monnen. Line 9547 he lette blawen beomen; & bonnien his ferden. Line 9548 leopen an steden; cnihtes gunnen riden. Line 9549 Þæs cnihtes weoren swiðe wate; & wenden ut at þan ȝate. Line 9550 to-somne heo comen sone; fastliche heo on-sloȝen. Line 9551 feolle fæie men; uolden isohten. Line 9552

Line 9552 þer wes muche blod-gute; balu wes on folke. Line 9553 imong þan fihte ful iwis; mon sloh þene eorl Gorlois. Line 9554 Þa gunnen his men fleon; & þa oðere after teon. Line 9555 heo comen to þan castle; and binnen heo þrasten. Line 9556 Sone hit comen binnen; ba twa þa uerden. Line 9557 þer ileste þat fiht; þurh þene dæi-liht. Line 9558 ær þe dai weore al a-sceken; wes þe castel biȝeten. Line 9559 næs þer nan swa wracche swein; þat he nes a wel god þein. Line 9560 Comen þa tidinde; in-to Tintageol an hiȝende. Line 9561 forð into þan castle. þer Vðer wes inne. Line 9562 þat islaȝen wes ful iwis; þe eorl heore læuerd Gorlois. Line 9563 & alle his here-gumen; and his castel inumen. Line 9564 Þis iherde þe king; þer he læi an skent%ting. Line 9565 & leop ut of bure; swulc hit an liun weore. Line 9566 Þa quað þe king Vðer; of þissen tiðende he wes wær. Line 9567 Beoð stille beoð stille; cnihtes inne halle. Line 9568 here ich æm ful iwis; eore læuerd Gorlois. Line 9569 and Iurdan mi bur-ward; and Brutael mi stiward. Line 9570 Ich & þas tweie cnihtes; leopen ut of þan fihte. Line 9571 and hider in we beoð idraȝen; neore we noht þere islaȝen. Line 9572 Ah nu ich wulle fusen; & sumnien mine ferde. Line 9573 and ich & mine cnihtes; scullen al bi nihte. Line 9574 faren in ænne tun; and imeten Vðer Pendragun. Line 9575 and buten he of sæhnesse speken; ich wulle me wu[r]ðliche awrake. Line 9576 & ȝe þesne castel; bi-cluseð swiðe uaste. Line 9577 and hateð me Ygerne; þat heo noht ne murne. Line 9578 Nu ich fare forð-riht; habbeoð alle gode niht. Line 9579 Bi-foren ferde Merlin; & þe þein Vlfin. Line 9580 & seoððen Uðer Pendragun; ut of Tintageolestun. Line 9581 æuere heo uerden alle niht; þat hit wes dæi-liht. Line 9582 Þa com he to þan ærde; þer læi his ferde. Line 9583 Merlin hafde a þene king; his wlite iset þurh alle þing. Line 9584 þa icneowen cnihtes; heore kinelauerd. Line 9585 þer wes moni oht Brut; mid blissen a-feolled. Line 9586 þa weoren inne Bruttene; blissen inoȝe. Line 9587 hornes þer bleowen; gleomen g[unn]en. gleowen. Line 9588 glad æuer-ælch cniht; al mid pælle bi-þæht. Line 9589 Þreo dæies wes þe king; wuniende þere. Line 9590 & þan feorðe dæie; to Tintaieol he wende. Line 9591

Line 9591 He sende to þan castle; his selest þeines. Line 9592 & grætte Ygærne; wifuene aðelest; Line 9593 & sende hire taken; whæt heo i bedde speken. Line 9594 hehte heo þat heo aȝeuen; þene castel biliue. Line 9595 þer nes nan oðer ræd; for hire lauerd wes dæd. Line 9596 Ȝet wende Ygærne; þat hit soð weoren; Line 9597 þat þe dæde eorl; i-soht hafede his duȝeðe. Line 9598 and al heo ilæfde; þat hit læs weore. Line 9599 þat þe king Vðer; æuere weoren icumen her. Line 9600