Layamon's Brut (British Museum Ms. Cotton Caligula A.IX)

Lines 701 through 800

Peytou heo letten on riht hond; swa heo comen a þet lond. Line 701 in are swiðe feire æ; þer Læire falleð i þa sæ. Line 702 Seoue niht & enne dæi; Brutus i þare hauene læi. Line 703 & he sende ȝeond þat lond; & scawede þa leoden. Line 704 Goffar þan king of Peyters; nes hit noht iqueme. Line 705 þat he iseh swlche sonden; faren ȝeond his londe. Line 706 Þe king heihte his wise men; þe wel cuðen a speche. Line 707 þat heo to þare sæ ferden; þar þa ferde læi. Line 708 & iwusten at þon cnihten; wet heo þer sohten. Line 709 wheþer heo walden hælden grið; & greten þes londes king. Line 710 þe heo wolden mid wiðere; þan kinge wið-stonden. Line 711 Numbert hehte þe alder-mon; þe sculde þas ernde don. Line 712 Corineus wes ifaren to wode; & draf þer þa wilde deor. Line 713 mid hornen & mid hunden; & mid fif hundred cnihten. Line 714 Imetten heo faren Numbert; þes kinges sonde of þat eard. Line 715 Numbert heom to clepede; mid ludere stefne. Line 716 Whonene beo ȝe cnihtes; Ȝe fare[ð] mid unrihte. Line 717 Ȝe huntieð i þes kinges friðe; þer-fore ȝe sculen beon fæie. Line 718 Ȝe doð þan kinge muchel scome; þer-fore ȝe sculen han grome. Line 719 Forboden he haueð his deor-frið; þer-fore ȝe sculen liggen stif. Line 720 Corineus i-werð him wroð; & wende him to-ȝeines. Line 721 & saide þas ilke word; mid muchelure wre[ð]ðe. Line 722 Cniht þu ært muchel sot; þat þu swa motest. Line 723 Ȝif þe king hit haueð forboden; ne scal him neuer beo þa bet. Line 724 ne nawit for his forbode; nulle ich hit bileuen. Line 725 to nimen his heortes & his hindes; & al þa deor þat ich finde. Line 726 Þa iwre[ð]ðede Numbert; þa kinges stiward of þat eard. Line 727 he leadde an his honde; enne bowe stronge. Line 728 & he þene streng up braid; balu com on ueste. Line 729

Line 729 On he sette ane fla; & he feondliche droh. Line 730 & þa fla lette gliden; bi Corineus siden. Line 731 Corineus bleinte; & þene scute bi-berh. Line 732 & towardes Numbert he leop; swilc hit an leon weora. Line 733 & þene bowe igreap; mid muchele strengðe. Line 734 He smot Numbert mid þon bowe; þat his hæfd-bon to-brec. Line 735 þat his blod & his brain; ba weoren to-dascte. Line 736 Fluȝen his i-feren; feondliche swi[ð]e. Line 737 to þon kinge Goffar; & saiden hine tiðende sære. Line 738 þet islawen wes Numbert; þe wes his awene stiward. Line 739 Þe king wes swiðe særi; & seorhful on mode. Line 740 & sende his sonde; ȝeond his kine-londe. Line 741 gaderede his ferde; þer weoren men fæie. Line 742 Þa ferde wes isumned; & heo forð fusden. Line 743 toward sele Brutun; þer he bi sæ wonede. Line 744 Brutus wes swiþe war; for wisdome him fulede. Line 745 haures he sende; to hirede þes kinges. Line 746 to witen of his farcost; wher he wolde feihten. Line 747 Þa hawres ferden; & sone aȝein comen. Line 748 & comen to heora læuarda; þer he lai bi hauene. Line 749 & þeos word him seiden; al swa hit s[oð] iwarð. Line 750 Hal beo þu Brutus; Þu ert þe hexste of us. Line 751 Nu hafð Goffar þe king; igadered his ferde. Line 752 muchel ferd & riche; & heȝe word he spekeð. Line 753 þat alle heo wullet quellen; quic þat heo findeð. Line 754 & þa scipen to-draȝen; & þa wif drenchen. Line 755 Nulleð heo leaue; nenne of ous a-liue. Line 756 Brutus nom al his ȝunge folc; & hem to scipe fusede. Line 757 & alle his æhte; his folc bitahte. Line 758 & to heom seide; Brutus þe sele. Line 759 Ȝe beoð mine leofe men; Hercniað mine lare. Line 760 Ne cume ȝe neauer wi[ð]-vten scipes bord; ær ich ou sende sutel.word. Line 761 wheðer ich maȝe þe ufere hond; habben of þan kinge. Line 762 Brutus nom his cnihtes; & iwende forð-rihtes. Line 763 to þon ilke weie; þer him iwised wes. Line 764 þer þe king walde forð; mid muchelere his ferde. Line 765 To-gadere heo comen; hardliche heo on-sloȝen. Line 766 þer wes swiðe strong feht; feollen þe feie. Line 767 þer wes moni steap mon; mid stele to-swngen. Line 768

Line 768 Longe a dai leste þat feht; þer feol moni god cniht. Line 769 Corineus com quecchen; & to him-seolfe queð. Line 770 A-wæi Corineus; Nere þu icoren kempa. Line 771 Cuð nu þine strengða; & þina stepa main. Line 772 & þisse Peytisce folc; fal to þe grunde. Line 773 Corineus heom rasde to; swa þe rimie wulf. Line 774 þane he wule on scheapen; scaðe-werc wrchen. Line 775 Breid he mid swiðeren hond; a sweord muchel & swi[ð]e strong. Line 776 al þat he þer-mid hitte; al hit a-dun healde. Line 777 Neora þa bearn nea swa strong; þah he hefde brunie on. Line 778 ȝif he hine mid sweorde at-ran; nea ras he neuer-mare. Line 779 Þa he hefde twa hundred; mid sweorde to-hewen. Line 780 þa brac þat sweord in his hond; riht be þere hilte. Line 781 Þa wes wroð Corineus; & þas word cleopede. Line 782 ((Wa)) wrðe auer þene smið; þa þe mid honden smeo[ð]ðede. Line 783 Corineus abuten bi-heold; for þe bearn was abolȝen. Line 784 & igrap of onnes monnes honde; ana wiæx swiðe stronge. Line 785 al þat he neh com; þer-mid he hit aquelde. Line 786 Þe king sette to fleonne; & al þa ferde eafter. Line 787 & Corineus heom eafter com; kenliche swiðe. Line 788 & heom to clepede; þe unimete kempa. Line 789 Goffar mid þire ferde; wi wolt þu fleam makian. Line 790 Ne miht þu na-wiht so fleon; ȝif þu us wlt heonne fleman. Line 791 þu most swiþer fehten; er we heonne iwenden. Line 792 Ne ganninde ne ridinde; ne du((r))ste him nan abiden. Line 793 Þe king hefde enne þein swiþe heard; he was i-haten Suard. Line 794 he bi-heold Corineum; þe heom after com. Line 795 Suard hefde to i-feren; þreo hundred ridearen. Line 796 he wende on-ȝean sone; & he ohtliche feaht. Line 797 Nes hit noht longe; þat Suard mihte stonde. Line 798 for Corineus him geinde to; mid his guð-strencðe. Line 799 he gurde Suard on þat hæfd; þat he grund sohte. Line 800