Layamon's Brut (British Museum Ms. Cotton Caligula A.IX)

Lines 8701 through 8800

& Mærlin eode abuten; & ȝeornen gon bihalden. Line 8701 þrie he eode abuten. wið-innen; & wið-uten. Line 8702 & sturede his tunge; al-se he bede sunge. Line 8703 þus Merlin dude þer; þat cleopede he Vðær. Line 8704 Vther com swiðe; & alle þine cnihtes mid þe. Line 8705 & winneð þas stanes alle; ne scullen ȝe læuen nænne. Line 8706 for nu ȝe maȝen heom h[e]bben; swulche veðerene balles. Line 8707 & swa ȝe sculleð heom mid ræde; to ure scipen lede. Line 8708 Þeos stanes heo ladden; swa Merlin heom radde. Line 8709 & duden heom in heore scipen; & seileden uorð to iwiten. Line 8710 & swa heo gunnen wenden; in-to þissen londe. Line 8711 & ladden heom in ann velde; þe is wunder ane brad. Line 8712

Line 8712 he is brad & swiðe muri; on-uæst Ambres-burie. Line 8713 þer Hengest biswæc; Bruttes mid sæxen. Line 8714 Mærlin heom gon ræren; alse heo stoden ærer. Line 8715 swa næuer nan o[ð]er mon; þene craft ne cuðe don. Line 8716 ne næuer ær þer bi-foren; nes na mon swa wis iboren. Line 8717 þat cuðe þet weorc rihten; & þa stanes dihten. Line 8718 þat tidende; com to þan kinge. i þan norð ende; Line 8719 of Merlines fore. & of Vthæres his broðer; Line 8720 þat heo weoren mid isunde; i-cumen to þissen londe. Line 8721 & þat þat worc wes al idiht; & iset up-riht. Line 8722 Þe king wes an breoste; wunder ane bliðe. Line 8723 & lette beode hustinge; swa mid swa wes al his lond. Line 8724 þat al his folc swa swiðe muri; come to Amberes-buri. Line 8725 al his drihtliche uolc; to White-sune-dæie. Line 8726 Þider com Aurilie þe king; & al his folc mid him. Line 8727 a Whiten-sunen-dæie; he þer wærf makede. Line 8728 al-se ich þe wulle telle; a þisse boc-spelle. Line 8729 Weoren a þan walde; teldes itælded. Line 8730 in þan brade uelde; niȝe þusend teldes. Line 8731 Al þan Whitensunendæi; þe king a þan uelde læi. Line 8732 hæt halȝien þe stude þe hæhte Stanhenge. Line 8733 Þreo dæies fulle; wunede þe king stille. Line 8734 i þan þridde dæie; heȝe wurðede his duȝeðe. Line 8735 he makede tweie biscopes; wunder ane gode. Line 8736 Seint Dubriz; to Kaerliun; to Eouuerwic. Seint Samson. Line 8737 beien heo iwurðen hali; & mid Gode haȝe. Line 8738 I þan feorðe dæie; duȝeðen to-dælden. Line 8739 and swa ane stunde; hit stod a þan ilken. Line 8740 Þa ȝet þer wes a luðer gume; Passent Vortigernes sune. Line 8741 wes þe ilke Passent; in-to Wælisc londe iwent. Line 8742 and þer a þen ilke daȝen; wes bicumen ut-laȝe. Line 8743

Line 8743 Ah ne durste he noht longe wunien þer; for Aurilie & for Vther. Line 8744 ah he biȝet scipen gode; & ferde bi sæ-flode. Line 8745 in-to Alemaine he uerde; mid fif hundred monnen. Line 8746 & þer he biwon muchel uolc; & makeden scip-ferde. Line 8747 & for swa longe; þat he com to þisse londe. Line 8748 in-to þere Humbre; þer he hærmes worhte. Line 8749 Ah ne durste he noht longe; i þan ænde at-stonde. Line 8750 Þe kin[g] ferde þider-ward; & Passent fleh aweiward. Line 8751 æfter sæ swa longe; þat he com to Irlonde. Line 8752 Sone he þer funde; þene king of þan londe. Line 8753 his heorte wes swiðe sær; he grette þene king Gillomar. Line 8754 Hail seo þu Gillomar; gumene ælder; Line 8755 ich æm to þe icume; ich wes Vortigernes sune. Line 8756 mi fader wes Brutlondes king; he luuede þe þurh alle þing. Line 8757 & ȝif þu woldest to-ȝere; beon þider min iuare. Line 8758 swa wit sculden ispæcken; & minne fader wel wreken. Line 8759 & wel wreken þi folc; þat Vther her qualde. Line 8760 & þi sel-cuðe wærc; þat heo heonne droȝen. Line 8761 & æc ich iherde suggen; þer ic ferde inne sæ. Line 8762 þat þe king Aurilien; seoc is iwurðen. Line 8763 & lið inne Winchæstre; a bedde ful faste. Line 8764 Þu miht ileue me inoh; for þis is witerliche soð. Line 8765 Passent & Gillomar; makeden heore for-ward þar. Line 8766 aðes heo sworen; monie & unifohȝe. Line 8767 þat heo wolden al þis lond; sætten on hæore tweire hond. Line 8768 þe aðes weoren isworene; ah æft heo weoren for-lorene. Line 8769 Þe king gadere[de] ferde; wide ȝeond his ærde. Line 8770 to þere sæ beoð iwende; Gillomar & Passen. Line 8771 in-to þan scipen eoden; & forð heom letten gliden. Line 8772 Forð heo wenden biliue; þat heo comen to Meniue. Line 8773 þat wes a þan time; tun swiðe hende. Line 8774 þat mon nu iwitterli; clepeð Seint Deouwi. Line 8775 Þer heo nomen hauene; mid heȝere blisse. Line 8776 Scipen eoden a þat strond; cnihtes eoden. a þat lond. Line 8777 Þa sæide Passent touward Gillomar he went. Line 8778 Seie me king Gillomar; nu we beoð icumen her. Line 8779 Nu ich sette þe an hond; halfendæl þis kinelon[d]. Line 8780 for is of Winchastre icume; to me anes cnihtes sune. Line 8781 & sæið me swulne ræd; þat Aurilie wule beon dæd. Line 8782 þat ufel is under his ribben; þat ne mæi he noh[t] libben. Line 8783 Her wit scullen wel wreken; unker wine-mæies. Line 8784 biwinnen his wunseles; swa us bið alre selest. Line 8785 To þan kinge com þat word; in-to Winchæstre. Line 8786 þat Passent & Gillomar; weoren mid ferde icumen hær. Line 8787

Line 8787 Þe king cleopede Vther; þe wes his leoue broðer. Line 8788 Vther be[d] uerde; ȝeond al þissen ærde. Line 8789 & far to ure feonden; and drif heom of ærde. Line 8790 oðer þu heom fusen; oðer þu heom feolle. Line 8791 Ich wolde faren æc. ȝif ich neore swa seoc. Line 8792 ah ȝif ich mai beon feore; ich þe cumen after sone. Line 8793 Al dude Uðer; swa þe king him sæide þer. Line 8794 & Passen at Seint Deowi; sorȝen iworhte þer-bi. Line 8795 and þe king Gillomar; muchel sorȝe he dude þær. Line 8796 Brutlond heo þurh-arnden; hærȝede & barden. Line 8797 & Vther i þissen ærde; sumnede his ferde. Line 8798 & hit wes longe uirst. ær he mihte fusen a-riht. Line 8799 & Passent West Walisc lond; set an his aȝere hond. Line 8800