Layamon's Brut (British Museum Ms. Cotton Caligula A.IX)
Lines 1 through 100
An preost wes on leoden; Laȝamon wes ihoten.
he wes Leouenaðes sone; liðe him beo Drihten.
He wonede at Ernleȝe; at æðelen are chirechen.
vppen Seuarne staþe; sel þar him þuhte.
on-fest Radestone; þer he bock radde.
Hit com him on mode; & on his mern þonke.
þet he wolde of Engle; þa æðelæn tellen.
wat heo ihoten weoren; & wonene heo comen.
þa Englene londe; ærest ahten.
æfter þan flode; þe from Drihtene com.
þe al her a-quelde; quic þat he funde.
buten Noe.& Sem; Iaphet & Cham.
& heore four wiues; þe mid heom weren on archen.
Laȝamon gon liðen; wide ȝond þas leode.
& bi-won þa æðela boc; þa he to bisne nom.
He nom þa Englisca boc; þa makede Seint Beda.
An-oþer he nom on Latin; þe makede Seinte Albin.
& þe feire Austin; pe fulluht broute hider in.
Boc he nom þe þridde; leide þer amidden.
þa makede a Frenchis clerc;
Wace wes ihoten; þe wel couþe writen.
& he hoe ȝef þare æðelen; Ælienor
þe wes Henries quene; þes heȝes kinges.
Laȝamon leide þeos boc; & þa leaf wende.
he heom leofliche bi-heold. liþe him beo Drihten.
Feþeren he nom mid fingren; & fiede on boc-felle.
& þa soþere word; sette to-gadere.
& þa þre boc; þrumde to are.
Nu bidde[ð] Laȝamon alcne æðele mon;
for þene almiten Godd.
þet þeos boc rede; & leornia þeos runan.
for his fader saule; þa hine for[ð] brouhte.
& for his moder saule; þa hine to monne iber.
& for his awene saule; þat hire þe selre beo. Amen.
Nv seið mid loft-songe þe wes on leoden preost.
al swa þe boc spekeð; þe he to bisne inom.
þa Grickes hefden Troye; mid teone bi-wonen.
& þat lond iwest; & þa leoden of-slawen.
& for þe wrake-dome; of Menelaus quene.
Elene was ihoten. alðeodisc wif.
þa Paris Alixandre; mid pret-wrenche. bi-won.
for hire weoren on ane daȝe; hund þousunt deade.
Vt of þan fehte; þe was feondliche stor.
Eneas þe duc; mid erm[ð]en at-wond.
Nefede he boten anne sune; þe was mid him isund.
Asscanius was ihoten; nefede he bern no ma.
& þes duc mid his drihte; to þare sæ him droh.
of kunne & of folke; þe fulede þan duke.
of monne & of ahte. þe he to þare sæ brouhte.
& tuenti gode scipen. he guðliche fulde.
& þa scipen foren wide; ȝeon þare wintrede sæ.
mid wolcnen & mid wedere; heo þoleden wen-siðes.
ant mid muchelure care; heo to londe bicomen.
On Italiȝe heo comen to londe; þar Rome nou on stondeð.
fele ȝer under sunnan; nas ȝet Rome bi-wonnen.
& heuede Eneas þe duc; mid his driht-folcke.
widen iwalken. ȝend þat wide water.
moni lond umbe-rowen; redes him trokeden.
On Italiȝe he com on lond; þat him was iqueme.
A þon londe he fund mete; & he hine mid monscipe biwon.
& mid golde and mid gersume; & he griðliche spac.
I þere Tyure he eode alond; þer þa sea wasceð þat sond.
ful neh þan ilke stude; þar Rome nou stondeð.
Þe king was ihoten Latin; þe on þan londe wes.
hey wes and riche; & he wes redesful.
mid wintre he wes bi-weaued. swo hit wolde Godd.
Þar com Eneas; & grette þen alde king.
& he hine feire on-feng; mid allen his folke.
Muche lond he him ȝef; & mare him biheyte.
an-long þare sea;eacute; siden & widen.
Þe king heuede ane douter; þe him was swiþe deore.
Eneam he heo biheyte; to habben to wife.
& after his daye; al his drihliche lond.
for he nefde nenne sune; þe sarure was his heorte.
Þat maiden wes ihoten Lauine; seþen heo wes leodena quene.
feier wes þe wimmon; & wunsum hire monnen.
Ah Turnus was ihoten þat wes of Tuskanne duc;
þet lufede þet maiden; & hire monscipe bed.
þat he heo wolde habben; to heiȝen are quene.
Þa com þat word to him; þat was widene cuð.
þat þe king Latin; ȝef Lauine his douter.
Eneam to are brude; for heo wes his deore bearn;
Þa wes Turnus sari; & soruful on his mode.
for he heo heuede swiþe ilofe[d]; & luf-þing hire biheite.
Weorre makede Turnus; mid teonen he wes idrefe[d].
wið Eneam he nom an feiht; þat wes feondliche strong.
hond wið honde; fuhten þa heȝe men.
Teone wes on compe; þar Turnus feol.
mid mechen to-heawen; his monscipe wes þe lasse.
Eneas nom Lauine; leofliche to wife.
he wes king & heo quen; & kine-lond heo welden.
inne griðe & inne friðe; & freoliche loueden.
Seoþen Eneas Lauine heuede inomen; & þa leodene bi-wnnen.
he makede enne stronge castel; mid starke ston walle.
Lauine hehte his leuemon; þene castel he clepede Lauinion.
þat wes for hire worðscipe; wel þat he hire uþe.
Feour winter he heuede þat wif; mid wrðscipe to welden.
after þa feourðe ȝere he was dead; his freonden hit of-þuhten.