Layamon's Brut (British Museum Ms. Cotton Caligula A.IX)

Lines 15201 through 15300

and ȝaf him wickinge; ȝeond Irlonde. Line 15201 Lette we nu beon Cadwaðlan. and ga we to Edwine aȝan. Line 15202 Edwine in þissen londe; a-marden þas leoden. Line 15203 burȝes he barnde; castles he ualde. Line 15204 his here wrohte on londe; harmes vniuoȝe. Line 15205 al Cadwaðlanes lond; he walde to his aȝere hond Line 15206 Þa comen hauweres; to hire((de)) þas kinges. Line 15207 and seiden tidende; Edwine kinge. Line 15208 wa wrðe heom ((for)) þon; þat heo iboren weore. Line 15209 saȝen heo him sæiden; of ane mæidenne. Line 15210 þat wes Briennes suster hende; ueirest wifmonne. Line 15211 heo wunede i Winchæstre; inne þan castle. Line 15212 And Edwine mid his ferde; þider-ward wende. Line 15213 sone swa he þider com; mid strenðe he heo nom. Line 15214 ladden heo to Eouuerwic anan; cnihtes swiðe wel idon. Line 15215 to bure me ladde; to þas kinges bedde. Line 15216 Þe king dude vnwisdom; þat he þat ilke maide nom. Line 15217 for þe wifmon a; wes þes ilke kinges iua. Line 15218 Þa wunede i þan hirede; an clarc þe com from Spaine. Line 15219

Line 15219 Pelluz wes ihaten; of heȝere laren. Line 15220 feole craftes he cuðe; þa he isah in þan lufte. Line 15221 on sterren and on sunne; and on þare sæ brade. Line 15222 in-siht he cuðe; a winde and a mone. Line 15223 of þan uisce þer he wlæt; and of wurmen þer heo crepe. Line 15224 Cadwaðlan in Irlonde; gadere[de] genge. Line 15225 and to scipe flutte; mid muchelre uerde. Line 15226 Pelluz swiðe ueorre; isah on þan sterre. Line 15227 þat ferde cumen wolde; uppen Ædwine kinge. Line 15228 and Pelluz hine lerde; Line 15229 hu he þas leoden mihtte. alre bezst bi-witen; Line 15230 Ba bi londen and bi scipen. Cadwaðlan and his men; Line 15231 ofte gunnen fusen. to cumen to þissen londen. Line 15232 biuoren wes æuere Edwine; and þa hafne heom for-warnde. Line 15233 þurh Pelluces lare; ne mihten heo cumen here. Line 15234 Wa wes Cadwalan; þat he wes on liuen. Line 15235 for he bigon þene swike-dom; uppen his sweord-broðe[r]en. Line 15236 and þer-uore him-self hafde; hærm þene meste. Line 15237 Cadwalan him to cleopede; his bezste cnihtes alle. Line 15238 and seide þat he wolde; wende to Brutaine. Line 15239 and þene king iseon; þe Salemon wes ihaten. Line 15240 an heorte him weore þe selere; for heo weoren isibbe. Line 15241 heo weoren of ane cunne; þa kinges beiȝe tweien. Line 15242 Bruttes heo weoren beine; ah swiðe heo weoren un-balde. Line 15243 Cadwaðlan to scipen com; and seh forð mid uðen. Line 15244 and seilede after vðe; unsel him wes on mode. Line 15245 to ane æit-londe heo bicomen; þat stondeð bi Gernemuðe. Line 15246 likede swa heom likede; þer heo gunnen wikie. Line 15247 þer heo abiden wederes; for þe wind heom stod to-ȝæines. Line 15248 Þa iwarð þe king þere; isæcled ful swiðe. Line 15249 and hafde þat uuel hate; binumen hi[m] wes þa hele. Line 15250 Þa niȝen dæȝes weoren aȝeong; þe king wes swiðe un-strong. Line 15251 þa wes ((he)) wræccheliche of-lust; after deores flæsce. Line 15252 Brien his mæi he cleopede; and sone hit him cudde. Line 15253 þat buten he hafde deores flasc anan; dæd he moste þolien. Line 15254 Ofte wes Briene wa; and neouuere wurse þene þa. Line 15255

Line 15255 hundes nom Brien; and hired-men wel idon. Line 15256 ȝeond wudes & ȝeond feldes; heo uerden bi-lifes. Line 15257 þurh nanes cunnes ginne; no mihten heo deor iwinne. Line 15258 nouþer heort no hinde; no mihte heo nauere ifinde. Line 15259 Þe king sende his sonde; after Brien þa wes to longe. Line 15260 Leof was þe king Briene; wa wes him on liue. Line 15261 Ofte he hine biðohte; what he don mahte. Line 15262 and biþohten him enne ræd; seoððen he þohten him swi[ðe] god. Line 15263 he igrap a nail-sax; sel-liche kene. and wel iwhæt. Line 15264 and feng him-seolue swa neh; þat he nom his aȝe þeh Line 15265 for unimete neode; þer-of he makede brede. Line 15266 he bredde heo an hiȝinge; and brohte heo þan kinge. Line 15267 Hail seo þu Cadwaðlan; þu ært mi kine-lauerd. Line 15268 ich habbe þe here i-broht; breden alre deorest. Line 15269 þat ich auere an æi borde; beren bi-uoren kinge. Line 15270 held me to and æt her-of sone; þin hele heo scal iwurðen. Line 15271 Þe king sæt on his bedde; his beornes hine biheolde. Line 15272 of þere brede he æt; sone þer-after him wes þæ bet. Line 15273 Þe king him gon to sweten; þat ufel hine gon for-leten. Line 15274 wið-innen þan fif niht; þe king iwræð fere forð-riht. Line 15275 swa næuer þe king nuste; whæt he inoted hafde. Line 15276 Þe king iwræð al uere; his folc iwarð bliðe. Line 15277 wind heom com on wille; heo wunden up seiles to coppe. Line 15278 scipen gunnen liðen; leod-scopes sungen. Line 15279 Ba weoren sehte; sæ & þa sunne. Line 15280 wind and þa wide se; ba eke isome. Line 15281 flod ferede þa scipen; scopes þer sungen. Line 15282 At Ridelæt he com alond; þer wes blisse & muche song. Line 15283 bitwixe Dinan & þere sæ; ȝet hit is isene. Line 15284 Sone swa he þer com; feire he wes under-uon. Line 15285 þa kinges weoren bliðe; beiene to-gaderes. Line 15286 þer wunede þe king; al þene winter a skenting. Line 15287 þer-after com leinten; and dæȝes gunnen longen. Line 15288 þer heo gunnen somnien; scipen uniuoȝen. Line 15289 folc unimete; grunden an uolde; Line 15290 Þus dude Cadwalan; and Peluz hit wuste a-nan. Line 15291 þurh his dweomer-cræften; þe wunede in þan lufte. Line 15292

Line 15292 and al þat he auunde; in þan lufte & bi þan grunde. Line 15293 þurh ælches cunnes þing; he warnede æuere Ædwine king. Line 15294 and dude him al to witen; of þare uerde; & of þan scipen. Line 15295 Cadwaðlan wes in Brutaine; mid Salemone þan kinge. Line 15296 þe wes his moddrie sune; and muchel hine. lufede. Line 15297 & þat iherde suggen; wel feole siðen. Line 15298 þat Pelluz þe hende; þe com ut of Spaine. Line 15299 warnede Edwine þene king; æuer þurh alle þing. Line 15300