Layamon's Brut (British Museum Ms. Cotton Caligula A.IX)
Layamon

Lines 15001 through 15100

þat mare luue weore ifunden; bi-tweone twei kingen.
     15001
for þat þe an hafden; þat heo hafden beien.
     15002
þe an heold þene oðer deorluker þene bro[ð]er.
     15003
Beien heo wifes nomen; ofte heo to-gadere comen.
     15004
þa þe wifes iwedded weoren; on ane time to bedde heo eoden.
     15005
æiðer mid his lufe wende; toward heore wife.
     15006
he streoneden tweien sunen; beien an ane timen.
     15007
beien an ane dæie; heo weoren afte iborne.
     15008
to-gadere heo weoren ibredde; to-gadere heo weoren iuedde.
     15009
Þa children wuxen; and wel iðoȝen.
     15010
wel wes heore aldren;
     15011
For to uæstnen þa luuen; of leofuen heore uæderen.
     15012
to-somne me heom tahte; to-somne me heom tuhte.
     15013
beien heo wereden; anes kunnes iweden.
     15014
al swa duden þa children; swa ær duden þa aldren.
     15015
swa mouchel luue heolden þat sellic þuhte monnen.
     15016
And þus heo wuneden here; wel feole ȝere.
     15017
þat þæ children weoren; muchele iwaxen.
     15018
riden uppen steden; and luueden cnihtes iweden.
     15019
heore maines heo uondeden; wel ueole siðen;
     15020
heore armes weore stronge; heo breken scaftes longe.
     15021
mid longe sweorden heo smitten; þa ȝifen smærte biten.
     15022
Heore uaderes þa comen; mid mucle faȝernessen.
     15023
inne Bruttaine; mid muclere blisse.
     15024
þa ȝet þat lond-riche; hehte Armoriche.
     15025
þa ȝunge men me dubbede. beiȝene to cnihte.
     15026
Wið an lut%tel ȝeren; þa uaderes dede weoren.
     15027
and þa twa children; weoren ihouen to ki[n]gen.
     15028
æiðer heold his i-cunden; swa duden ær heore ældren.
     15029
Þæ wes inne Cantware-buri; þa burh wes þa swiðe muri.
     15030
an ærche-biscop; þe wes mon swiðe god. Page  786
     15031
he for-ba[d] þan kingen; kine-helm to nimene;
     15032
a þat hin-seolf comen; and setten hine an heore hafden.
     15033
Þat bod wes ihalden; a þas ærchebiscopes onwalden.
     15034
and Cadwadðal his lond haueden; a þis hælue þere Humbre.
     15035
and Edwine al bi-ȝeonde; touward þan norð ende.
     15036
kinges heo weoren ((i))houene; & kinges isworene.
     15037
ah for-bode wes þa crune; an ure Drihtenes nome.
     15038
Cadwalan þohte. þe wes Cadwanes sune.
     15039
ofte he hine bi-þohte what he don mahte.
     15040
seoððen heore faderes beiene; forð weoren i-farene.
     15041
Næfde þa seht-nesse ilast; buten seouen ȝere urist.
     15042
Cadwalan hefde; castles swiðe monieȝe.
     15043
and þe riche-dom stod; mære on Cadðwalanes hond.
     15044
Cadwaðlan gon liðe; in-to Londene.
     15045
he sende men gode; after þan erchebiscope.
     15046
and hehte ful sone; þat he to Lundene come.
     15047
Þa he to Lundene com; iqueme hit wes þan kingen.
     15048
þe king auoten eode; to-ȝeines þan erche-biscope.
     15049
wið-uten his halle dure; and sæide Þu art wilcume.
     15050
& leof-liche hine bihedde; & lauerd hine cleopede.
     15051
He aȝaf ure Drihten; ælchere irihten.
     15052
he spac of feire lære; & al of Godes are.
     15053
his spechen weoren gode; wið þan ærche-biscope.
     15054
Þe king hine bi-þohte; feire & swiðe ofte.
     15055
þat he on his icunde; king hine makede.
     15056
To ane isette dæiȝe. þat folc þær i-somnede.
     15057
þer mæ Cadwaðlan sone; makede to kinge.
     15058
muchel wes þa blisse; þat wæs in þære burȝe.
     15059
Of þisse uare-coste; Adwine na-þing nuste.
     15060
a[h] sone swa he hit wiste; wrað he wes an heorte.
     15061
and seide auere wið and wið; Ich wulle makien un-frið.
     15062
and al ic wulle aquellen; þat ich quike uinde.
     15063
of Cadwaðlanes uolke; ualsest alre monne.
     15064
Uerde he go[n] gaderen; of feole þusend monnen.
     15065
he hehde ituht to herie; a þas half þære Humbre.
     15066
Eoden heom to ræde; cnihtes swiðe gode.
     15067
alle þa wiseste men; þa weore inne londe.
     15068
heo lerden Edwine king; þe wes heore lauerd. Page  788
     15069
þat he sende his sonde; to Cadwaðlane kinge.
     15070
& bisohte hine uæire; alse his leofe broðe[r].
     15071
and for þere muchele luue; þa heolde heore aldren.
     15072
þat hine letten king beon; and his kine-halm avon.
     15073
and he wolde aȝein wenden; heom to his folke;
     15074
ouer þere Humbre. and g((r))ið þær halden;
     15075
and ner æft a-ȝen teon. wið þan he moste king beon.
     15076
ihouen and ihalden; þurh þene heȝe Godd.
     15077
and he wolden bi his liuen; Cadwalain luuien.
     15078
and beon ȝaru to his neode; an ælchere þeode.
     15079
Þis iherde Cadwalan; þe king wes bi suððen.
     15080
and he andswerede; mid aðelere speche;
     15081
Nu ich iherd habbe; [wordes wise
     15082
of Edwine his bisocne] þe is mi broðe[r] deore.
     15083
ich me bi-ræde wulle; of swulchere neode.
     15084
and after ane lutel daȝen; him andsware ȝeuen.
     15085
whaðer he hit wolde iunne; oðer him for-beode.
     15086
hu swa his riche men; ræden him wolden.
     15087
Þe dæi wes isæt; a[h] lutel mon wes þe bet.
     15088
Þa þis al wes iwurðen; þa comen heo to ane uorde.
     15089
Duglas þa water wes ihaten; þer heo tou-wenden.
     15090
þer wes þa motinge; bituxe þan twam kinge.
     15091
Ædwine bisohte; mid alle þat he mahte.
     15092
þat Cadwalan him þolede; kine-helm to beberene.
     15093
and he hine wolde luuien; a to his liuen.
     15094
Riche men eoden to ræde; of swulchere neode.
     15095
summe hit gonnen ræden; summe to for-beoden.
     15096
summe þer heolden wel to; summe nolden hit no.
     15097
Þa while þa cnihtes wise; þa spechen sculden rihte.
     15098
þe king in are medewe; alihte of his stede.
     15099
þan kinge luste slepe; þa riche weoren at rede.
     15100