Layamon's Brut (British Museum Ms. Cotton Caligula A.IX)

Lines 1101 through 1200

Al his folc he losede þer; þurh Locri[n] & Camber. Line 1101 & him-seolf mid wæne; ferde into ane watere. Line 1102 Þer-inne he adronc; & mid him muchel folc. Line 1103 For Humber kinges deaðe; Humbre was ihaten. Line 1104 Humber wi[ð] swiðe mucle an here; in Alemaine hefde iherȝed. Line 1105 & hefde þat lond swiðe awest; & þat folc swiðe awemmed. Line 1106 He nom of þan mon-kunne; þreo swiðe feire mæidene. Line 1107 Þeo an wes ihaten Astrild; anes hahȝes kinges dohter. Line 1108 þa alre feireste wifmon; þe þa wunede on folke. Line 1109 Þas mæidenes weoran i þan scipen; mid Humbres monnen. Line 1110 þe wuste Humberes fæi; þe whilen he wende to fehten. Line 1111 Þa Humber was dead; in Humbre adrunken. Line 1112 Locrin & Camber to þon scipen comen. Line 1113 for to habben al þa æhte; þe Humber king aute. Line 1114 Imong þon scipmonnen; i funden þa þreo maidenes. Line 1115 Locrin iseh þer Æstrild; & he heo leofliche bi-heold. Line 1116 & he heo mid armen inom; eð him wes on heorten. Line 1117 & he hire to seide; Sel þe scal iwurðen. Line 1118 wifmon þu eart hende; & ic þe wlle habben. Line 1119

Line 1119 mid wurðscipen hæȝe; to richen are quene. Line 1120 þa while þe ic libbe; oðer nulle ic habben. Line 1121 for þe ic am swa bliðe; swa næs I næuer ær on liue. Line 1122 Þa ȝet leouede Corineus; þe in Cornwaile wes dux. Line 1123 nefde he bute æne dohter; ah heo wes him swiðe deore. Line 1124 Locrin him hefde on foreward; habben þat he heo wolde. Line 1125 & he heo hæfde i hond-fæst; at-foren his hired-monnen. Line 1126 ah for Æstrilde luue; he heo wolde bi-læuen. Line 1127 Þis iherde Corineus; þe wes in Cornwaile dux. Line 1128 þet his leoue dohter; wes Locrin at-laðed. Line 1129 Corineus wes un-eðe; & wa on his mode. Line 1130 He ferde to þisse londe; þat he com to Locrine. Line 1131 He lædde on his exle; ane muchele wi-eax. Line 1132 He stod bi-foren Locrine; & laðelich him lokede on. Line 1133 & þas word him iqueð; Corineus þe kempa. Line 1134 Seie me Locrin; saie me læðe mon. Line 1135 saie me þu ebare sot; seorwe þe beoð ȝeueðe. Line 1136 ne scal þe nan man scilden; wið scondliche deaðe. Line 1137 Þu hauest mine dohter; þat is mi bearn deore; Line 1138 & me seolfan iscend; þer-fore þu scalt scrinkin. Line 1139 Ic liðde mid þine fader; & ledde his ferde. Line 1140 moni swinc moni swæt; monine seorhfulne pleiȝe. Line 1141 moni grimne reas; moni greatne dunt. Line 1142 moni ane wnde; moni wnderlich feht. Line 1143 þolede ich on folde; bi-foren Brutone. Line 1144 þe wes mi deore wine; mi drihliche lauerd; Line 1145 Þer-fore þu scalt beon feie. for nes he neuer þi fader; Line 1146 for ȝif þu were Brutus sune; ne deodest þu me nane sceome. Line 1147 For his luue moni eotend; ic leide dead a þene grund. Line 1148 an þu mi muchele swinc; mid sare forȝeldest. Line 1149 bi-leafest feier & sceone; mine dohter Guendoleine. Line 1150 for al-þeodisc meiden; Æstrild ihate. Line 1151 Þu nast of whulche londe; heo com heder liðen. Line 1152 ne whulc king is hire fader; ne whulc quen hire moder. Line 1153 Ah þu scalt habben for hire luue; þat þe is alre laðest. Line 1154 þat al þu scalt to-scæne; mid scearpe mire eaxe. Line 1155 Corineus up ahof; & his eax adun sloh. Line 1156 and smat in enne muchele stane; þer Locrin stod vuenan. Line 1157 Þe stan al to-sceande; & Locrin at-sturte. Line 1158 Alle heo hiȝeden to; an elcher halfe. Line 1159

Line 1159 & to-deleden heom atwa; teona wes on hirde. Line 1160 þer wes moni hah word. Line 1161 & þa alre seleste eoden to-sumne; Line 1162 hulden muchel husting. þa hehste of þan hirde. Line 1163 þat heo nolden iþolian; for al-þeodene gold. Line 1164 þat þeos laððe weore; bi-tuxe Corineo & Locrine. Line 1165 Ah we wlleð ræden; & we wlleð runan. Line 1166 þat weo nimen Wændoleine; Locrine to are quene. Line 1167 & halden alle vre aðes; bi-twux Corineo & Locrine. Line 1168 & halden hiredes luue; mid soð-fasten huiȝe. Line 1169 & senden Æstrilde; vt of þissen londe. Line 1170 & Locrin þis biluuede; for hit wes his leodene read. Line 1171 He nom Guendoleine; & hefde heo to wiue; Line 1172 & he hit seide; soð þeih hit nere. Line 1173 þat he wolde Æstrilde; senden vt of londe. Line 1174 Ah ne dude he nawiht swo; for swiken he þohte. Line 1175 ah he nom his enne hired-mon; þe he wel trowede on. Line 1176 & hehte hine swiðe stille steolen vt of hirede. Line 1177 & hehte hine faren to þon tune; þe Trinouant wes ihaten. Line 1178 þe wes on vre leoden; Lundene ihaten. Line 1179 & þar an hiȝinge; þurh-ut alle þinges. Line 1180 makian an eorð-hus. eadi & feier. Line 1181 þe walles of stone; þe duren of whales bone. Line 1182 & þat inne swiðe feire stude; from socne þes folkes. Line 1183 & dude þer-inne muchel col; & claðes i-nowe. Line 1184 pælles & purpras; & guldene ponewæs. Line 1185 muchel win muchel wex; muchel wunsum þing. Line 1186 & seoððen forð-rihtes; wende al bi nihte. Line 1187 & mid stilliche ginne; brohte Æstrild þer-inne. Line 1188 Þus dude þes riche mon. swa Locrin hine hefde ihaten. Line 1189 for euer-ulc god mon; ah his lauerdes heste to don. Line 1190 Seouen ȝer wes Astrild; i þissen eorð-huse. Line 1191 þat neuer ne ferde heo wið-uten dore; ne na mon heo þer nuste. Line 1192 buten þe king Locrin; & his iueren mid him. Line 1193 Þonne he to Trinouant wende; þenne seide he to Wendoleine. Line 1194 þat he wolde beon seoueniht þære; & his godd hure. Line 1195 inne diȝelnesse; & elles he ne durste. Line 1196 þat ei mon wuste; whet he þer sohte. Line 1197 Guendoleine him ilefede; luðere weren his craftes. Line 1198 Þus ferde Locrin þe wilde; þat Astrild wes mid childe. Line 1199 & Guendoleine al-swa; mid childe heo weren ba twa. Line 1200

Line 1200