Layamon's Brut (British Museum Ms. Cotton Caligula A.IX)

Lines 10601 through 10700

Nu heom to nu heom to; þat formest is wel idon. Line 10601 Bruttes hom leiden on; swa me scal a luðere don. Line 10602 heo bittere swipen ȝefuen; mid axes & mid sweordes; Line 10603 Þer feolle Cheldriches men; fulle twa þusend. Line 10604 swa neuere Arður ne les; næuere ænne of his. Line 10605 þer weoren Sæxisce men; folken alre ærmest. Line 10606 & þa Alemainisce men; ȝeomerest alre leoden. Line 10607 Arður mid his sweorde; fæie-scipe wurhte. Line 10608 al þat he smat to; hit wes sone for-don. Line 10609 Al wæs þe king abolȝen; swa bið þe wilde bar. Line 10610 þenne he i þan mæste; monie [swin] imeteð. Line 10611

Line 10611 Þis isæh Childric; & gon him to charren. Line 10612 & beh him ouer Auene; to burȝen him-seoluen. Line 10613 and Arður him læc to; swa hit a liun weoren. Line 10614 & fusde heom to flode; monie þer weoren fæie. Line 10615 þer sunken to þan grunde; fif & twenti hundred. Line 10616 þa al wes Auene stram; mid stele ibrugged. Line 10617 Cheldric ouer þat wate[r] flæh; mid fif-tene hundred cnihten. Line 10618 þohte forð siðen; & ouer sæ liðen. Line 10619 Arður isæh Colgrim; climben to munten. Line 10620 buȝen to þan hulle; þa ouer Baðen stondeð. Line 10621 & Baldulf beh him after. mid seoue þusend cnihtes. Line 10622 heo þohten i þan hulle; hæhliche at-stonden. Line 10623 weorien heom mid wepnen; & Arð((ur)) awæmmen. Line 10624 Þa isæh Arður; aðelest kingen. Line 10625 whar Colgrim at-stod; & æc stal wrohte. Line 10626 þa clupede þe king; kenliche lude. Line 10627 Balde mine þeines; buhȝeð to þan hulles. Line 10628 For ȝerstendæi wes Colgrim; monnen alre ken%nest. Line 10629 nu him is al swa þere gat; þer he þene hul wat. Line 10630 hæh uppen hulle; fehteð mid hornen. Line 10631 þenne come[ð] þe wlf wilde; touward hire winden. Line 10632 Þeh þe wulf beon ane; buten ælc imane. Line 10633 & þer weoren in ane loken. fif hundred gaten. Line 10634 þe wulf heom to iwiteð; and alle heom abiteð. Line 10635 Swa ich wulle nu to-dæi; Colgrim. al fordemen. Line 10636 ich am wulf & he is gat. þe gume scal beon fæie. Line 10637 Þa ȝet c[l]eopede Arður; aðelest kingen. Line 10638 Ȝurstendæi wes Baldulf; cnihten alre baldest. Line 10639 nu he stant on hulle; & Auene bi-haldeð. Line 10640 hu ligeð i þan stræme; stelene fisces. Line 10641 mid sweorde bi-georede; heore sund is awemmed. Line 10642 heore scalen wleoteð; swulc gold-faȝe sceldes. Line 10643 þer fleoteð heore spiten; swulc hit spæren weoren. Line 10644 Þis beoð seolcuðe þing; isiȝen to þissen londe. Line 10645 swulche deor an hulle; swulche fisces in wælle. Line 10646 Ȝurstendæi wes þe kaisere; ken%nest alre kingen. Line 10647 nu he is bicumen hunte; & hornes him fulieð. Line 10648

Line 10648 flihð ouer bradne wæld; beorkeð his hundes. Line 10649 he hafeð bihalues Baðen; his huntinge bilæfued. Line 10650 freom his deore he flicð; we hit scullen fallen. Line 10651 and his balde ibeot; to nohte ibringen. Line 10652 and swa we scullen bruken; rihte bi-ȝæten Line 10653 Efne þan worde; þa þe king seide. Line 10654 he bræid hæȝe his sceld forn to his breosten; Line 10655 he igrap his spere longe; his hors he gon spurie. Line 10656 Neh al swa swi[ðe] swa þe fuȝel fliȝeð. Line 10657 fuleden þan kinge; fif and twenti þusend. Line 10658 whitere monnen; wode under wepnen. Line 10659 hælden to hulle; mid hæhȝere strengðe. Line 10660 and uppen Colgrime smiten; mid swiðe smærte biten; Line 10661 And ((Colgrim)) heom þer hente; and feolde þa Bruttes to grunde. Line 10662 i þan uormeste ræse; fulle fif hundred. Line 10663 Þat isæh Arður; aðelest kingen; Line 10664 and wrað him iwræððed; wunder ane swiðe. Line 10665 and þus cleopien a-gon; Arður þe hæhȝe man. Line 10666 War beo ȝe Bruttes. balde mine beornes. Line 10667 Her stondeð us biuoren; vre ifan alle icoren. Line 10668 gumen mine gode; legge we heom to grunde. Line 10669 Arður igrap his sweord riht; & he smat ænne Sexise cniht. Line 10670 þat þat sweord ((þat)) wes swa god; æt þan toþen at-stod. Line 10671 & he smat enne oðer; þat wes þas cnihtes broðer; Line 10672 þat his halm & his hæfd; halden to grunde. Line 10673 þene þridde dunt he sone ȝaf; & enne cniht atwa clæf. Line 10674 Þa weoren Bruttes; swiðe ibalded. Line 10675 & leiden o þan Sæxen; læȝen swi[ðe] stronge. Line 10676 mid heore speren longe; and mid sweoreden swiðe stronge. Line 10677 Sexes þer uullen; & fæie-sih makeden. Line 10678 bi hundred bi hundred; hælden to þan grunde. Line 10679 bi þusund & bi þusend; þer feollen æuere in þene grund. Line 10680 Þa iseh Colgrim; wær Arður com tou-ward him. Line 10681 ne mihte Colgrim for þan wæle; fleon a nare side. Line 10682 þer fæht Baldulf; bi-siden his broðer. Line 10683 Þa cleopede Arður; ludere stefne. Line 10684 Her ich cume Colgrim; to cuððen wit scullen ræchen. Line 10685 nu wit scullen þis lond dalen; swa þe bið alre laððest Line 10686

Line 10686 Æfne þan worde; þa þe king sæide. Line 10687 his brode swærd he up ahof; and hærdliche adun sloh. Line 10688 and smat Colgrimes hælm; þat he a-midde to-clæf. Line 10689 and þere burne hod; þat hit at þe breoste at-stod. Line 10690 And he sweinde touward Baldulfe; mid his swiðren honde. Line 10691 & swipte þat hæfued of; forð mid þan helme. Line 10692 Þa loh Arður; þe aðele king. Line 10693 and þus ȝeddien agon; mid gomenfulle worden. Line 10694 Lien nu þere Colgrim; þu were i-clumben haȝe; Line 10695 and Baldulf þi bro[ð]er lið bi þire side. Line 10696 nu ich al þis kine-lond; sette an eower ahȝere hond. Line 10697 dales & dunes; & al mi drihtliche uolc. Line 10698 Þu clumbe a þissen hulle; wunder ane hæȝe; Line 10699 swulc þu woldest to hæuene; nu þu scalt to hælle. Line 10700