CHAPTER XXXI.
I wolde ye knew all ensaumple of the lady that wolde haue alwey a quarter of a day to arraie her.
THer was a ladi that duelled fast bi tho chirche, that toke euery day so longe tyme to make her redy that it made wery and angri the person of the chirche and the parisshenes to abide after her. And she happed to abide so longe on a Sonday that it was fer dayes, and euery man said̛ to other, "This day we trow shaƚƚ not this lady be kemed, and arraied and sum of hem cursed her, and saide, "The deueƚƚ arraye her onis, and he her merour, for because she makithe us euery day in use and to abide after her." And as God wolde shew for ensaumple, atte the same' tyme and houre as she loked in a mirrour, in stede of [fol/col 15b/2] the mirrour, the deueƚƚ turned to her his ars, the whiche was so foule and orible that for ferde she was wode and oute of her mynde, and was so sike longe; and atte the laste God sent her her witte; & she was chastised, and wolde no more make folke to mouse after her, but wolde he sonner arraied and atte the chirche thanne ani other. And she thanked God that he had chastised her so that she might amende her: and therfor here is an ensaumple that no body shulde take so long leyser to arraie hem that thei lese her masse and Goddes seruice, and make other also to lese it.