Page 364
[ XLIV. ]
(HOW A SON INDUCED HIS FATHER TO BECOME A MONK.)Addit. MS. 9066.
[leaf 58 (cont'd)]
There was a riche man̛, that had̛ a sonne, that concedered̛ his life was but shorte, and̛ thought he shuld̛ sone deye. he wente in to religion̛. when his fader wiste that, he wolde haue distroyed̛ the house; But his sone Come agayne hym, and̛ saide, "sir, why purpose ye to distroye þis monestre?" he answerid̛, and̛ saide, "my sone, aƚƚ I shaƚƚ dystroye but thou come home to my house. The sone answerid̛, and̛ saide, "fadir, gladly I wil come home to your house, if̘ ye wil putt awey a custome oute of youre lande that is there in." The fadir seide, that gladly he wolde do it. The sone saide, "alse sone deyeth the yong̘ as the olde; do awey this Custome, and̛ I shaƚƚ come to that londe." This herde the Fadir, and̛ atte worde of̘ his sone he lefte the worlde, and̛ wente into religion̛; beholdyng̘ that dethe is the messynger of the hie Emperour, that no man̛ spareth, and̛ it is the betille of hym̛ that made hevyn̛ and̛ Erth, whom̛ no man̛ may with-stonde, &c.