The University of Michigan Library provides access to these materials for educational and research purposes. These materials are in the public domain. If you have questions about the collection, please contact mec-info@umich.edu. If you have concerns about the inclusion of an item in this collection, please contact libraryit-info@umich.edu.
DPLA Rights Statement: No Copyright - United States
Pwas [was] an Emperoure Reignyng in the citee of Rome, & a-mong al oþere thinges he lovid̛ wel huntinge. And̛ as he Rode in a certen̛ tyme by a forest, he saw a man̛ Rynne afore him, with al the myght of his bodye, & an vnycorne Rynnynge aftir him, wher thorowe the man was gretly a-dredde, that for fer̛ he felle in to a
gret diche. neuer þe les he toke holde by a tree, by the whiche he wan̛ oute; & then he lokid̛ downe, & he saw at the fote of the tree an hidowse pitte, and̛ an̛ orible dragon̛ þere in, myning at the tree, and̛ abyding with an opin movthe when he shuld̛ falle; & beside this dragon̛ were twoo bestes, þe ton̛ was white, the toþere was blak; & þey gnowe at the Rote of the tree with alle theire myght, to throwe hit downe, in so muche that the wrecchid̛ man̛ felte it wagge; & abowte the sydes of þe diche wer̛ iiij. frogges sterting, the whiche witℏ hir venemovse brethe envenemyd̛ al the diche. He cast vp his yen̛, and̛ he saw a passage of hony fallyng fro braunche to braunche; & he sette his herte so moche to this swete syght of hony, þat he forgate that oþere pereƚƚ. So þere happid̛ a frend̛ of his go by the wey, & for he sawe him in so gret perille, he fet to him a laddir, that he myght come downe Safliche; but he yaf him so muche to this swettnes, that he wolde not thens, but yete hony, and̛ made him murye, & for-gate þe perillis. And̛ with in short tyme he felle downe in to the mowþe of the dragon̛; and̛ the dragon̛ yede downe in to the pitte, & devourid̛ him.