"that is a grete loue; I may no more aske." Then he asked̛ the
seconde doughter, how mych she louyd̛ hym̛? she sayde, she
louyd̛ hym̛ aboue aƚƚ Criatures of the worlde. "for
sothe," seide leyre, "I may no more aske." Than he asked̛ of the
yongeste doughter, how mych she louyd̛ hym̛? "Sir," she
seide, "my systers han̛ seide to you wordes of glosyng̘, but
I say to you trouthe. I love you as mych as I owe to loue my Fadire,
and̛ for to make you more Certayne how mych loue is worthe, I
shaƚƚ say you, as mych as ye han̛, so mych are ye worthe,
and̛ so mych I loue you." leyre wenyd̛ that she had̛
skorned̛, and̛ was wrothe, and̛ seide, that she
shuld̛ neuer haue lande of hym̛; But his othere doughters,
that mych louyd̛ hym̛, shuld̛ departe the lande betwene
hem̛, be Euyn̛ porcyons, and̛ she shuld̛ be
disheried̛. And̛ he maried̛ the Eldiste doughter to
Managles, the kyng̘ of Scotlonde; and̛ the tothere to
Hanemos, Erle of cornwaylle; and̛ the mariage was thus made of
the tone and̛ of the tothere, that the kyng̘ of Scottes and
the Erle of cornwayle shuld̛ departe grete bretayne, aftere his
dissese, so
that Cordeƚƚ, his
yongeste dougter, shuld̛ not haue of his. This maydyn̛
Cordeƚƚ was so fayre, and̛ so wele taughte, that it was
mervayle, so that Agape, kyng̘ of [leaf 74, back]
Fraunce, herde speke so grete of this maydyn̛
Cordeƚƚ, that he sente to kyng̘ leyre, that he wolde gyfe hym
here to wife. leyre sente worde agayne, that he had̛
departed̛ his lande bytwene his ij. Eldiste doughters; and̛
so he had̛ no more lande, the which he myght marie Cordeƚƚ,
his yongeste doughter, with. when̛ Agape herde this answere, he
sente agayne to leyre, and̛ seide, he asked̛ no thing̘
with here, but alonly here bodie, and̛ here clothing̘.
And̛ leyre, here fadre, made here wele to be arayed̛,
and̛ Clenly, and̛ sente here to the kyng̘ of Fraunce;
and̛ he Ioyfully ressayued̛ here, and̛ weddid̛
here, with grete worship, and̛ made here queen̛ of Fraunce.
The kyng̘ of Scottes and̛ the Erle of Cornwayle, that
had̛ weddid̛
the Eldiste doughters of
kyng̘ leyre, wolde not abide