Moral.
¶ This Emperour betokeneth our lorde Ihesu cryste. The rauyssher betokeneth euery synner, whiche rauyssheth goddes mercy as often as he dyffoyleth the commaundementes of god by synne / for ye deuyll may neuer ouercome man but yf it be suffred by wyll. For saynt Austyn sayth, Non est peccatum nisi sit voluntarium. It is no synne but yf it be voluntary. The synner rauyssheth the mercy of God as ofte as he hath very contrycyon. The rauyssher also is called afore ye Iustyce, whan the soule is departede frome ye body / & anone the fyrste damoysell, yt is, the deuyll, layde ayenst the synner, that ought to dye euerlastyngely by the lawe of ryghtwysnesse. But that other mayden, that is, Cryste, layde for her the mercy of Gode ought to helpe by contrycyon and confessyon, whiche is the hyghe waye to euerlastynge lyfe. Unto ye whiche god brynge bothe ye and me! Amen.