CHAPTER VIII.
WHen Macmurgh hadd his tale y-endyd̛ in his speche, Roberte Steuenes-Soñe spake to his fellowys, and to them in this maner Sayde: "Fyghten feris, and yonglynges y-know, that so many Perelis haue to-geddyr Sofferid̛, and euer in al aduentures, and of hey hert ben! If we Inwardly wndyrstonde what men we ben; wyth what lodes-man, and for what thynge, we this Perel vndirtoke; with boldnys, as we were wonyd̛, we shall ouercome; and the grace that we haue hadd ar this of god, ne shall vs not forsake. // Of [Fol. 5a.] the folke of Troy we Ben Kynly come, on that one syde fro the fryste begyninge; of Fraunce, we haue kynde on the othyr halfe. Throgh the kynde of troy, we sholde be bolde; throgh kynde of Fraunce, we ben wsyd in wepyn̛; and so as we ben of doubil maner kyndly, of good̛ herte and wel wepenyd, and wel lernyd̛ in wepyñ,—ne dout no man, that Suche vnwepenyd rascaill any Powere haue to vs to wyth-stonde. One that ouer syde, we come not into this londe as wagid̛ men, ne for no couetyse of golde, ne of Syluyr, ne of galiotȝ, ne robbers; but forto helpe this goode man that is so nobill and so fre, and, wyth his owyn men, wickydly was out of his londe drywe. We haue Pite of his harme; and helpyth vp that adoun̛ was caste / to his kynde state,