English conquest of Ireland : A.D. 1166-1185 : mainly from the 'Expugnatio hibernica' of Giraldus Cambrensis : part I, the text / edited by Frederick J. Furnivall.

CHAPTER LXII.

Aftyr that tyme that the kynges Sone hadde the lordshipp of Irland̛, and into the londe was come, aduentures befell that Maystyr geraude Sortely touchyth. Of thre castelis that he anoone ryght lette rere, oone at ardfynan, anothyr at lysmore, the thyrde at Tybraght. Of thre bolde and hardy knyghtes, that throw gret mysaduenture weryn slayne, Robert de Barry at lysmore, Reymond Hughes-sone at Olethan, Reymond of Canteton in Ossory. Of a party of the meny of ardfynan, that the kynge of Thomon̄ descomfited in a wodde ther neygh, On a Mydsomer day, And four knyghtes that were Slayn; and thay of Thomonde the same day wer discomfite tofor [Fol. 28a.] for tybraght; and a grete Irysℏ-man, Odrade, Was ther Slayn, wyth many othyr Of the meny of ardfynan, that Sone aftyr in a pray-takynge toward lymerike weies Discomfite [in praedae captione versus Limericum confectis.—Op. v. 386.] , and xix knyghtes wer Slayn. Of the Prynce of Desmonde, Dermot Maccarthy, that with many othyr in

a parlement besyde Corke, throgh Tybaud Wauter and the meny of Corke, was y-Slayn̄. Of the men of kynnaleȳn̄, that So boldely wentyn Into Myth, ther to take a pray, and ther weryn Slaȳn̄ throgh Willam le Petyte, and an C. hedys of ham broght to Deuelyn // Of othyr hooly bodies, Patrike, Bryde, and Colmekil / at doun y-found, and by Ihon̄ de Curcy were translated. Of Hugh de lacy, that to trysty was vpon his Irysℏ-men, And by traysone of ham was hedid at Dernagℏ // Of xiij^e knyghtes, that vndyr Ihōn̄ de Curcy weryn Slayn at a comynge out of connaght; of the bolde yonge knyght, Roger the Powere, that wyth many of his, throw trayson, in Ossory was Slayn̄; And Throw that thynge, aƚƚ the Irysℏ-men of the londe Pryuely Sworne ham to-giddyr ayeyn̄es the Englyssℏ-men; Wherthrow that, castellis in many Places weryn caste dovne, and many men Slaȳn̄, in Peril of al the londe. And of many othyr aduentures that by chanse fell, aftyr that the kynges sonne was lorde of Irlande, the whych Maystyr Geraud, ham and har gestis lewyth to othyr that ham write wille, and luste haw therto; And as thus an ende makyth of this boke.