CHAPTER XXXVII.
Thegh the kynge were wel longe in gret angwysche throgh his sonnes, as hit is to-fore tolde, natheles, amonge othyr nedys, he foryate note his Irlande. he take the letteres that ware made in the Consayl of Cassell, of the vnclene lyfe and the horribil Synnys that the Pepil of Irland lyuedyn In / In othyr wyse than crystyn men oght lyue; and the lettres, al Ensealid̛ as thay were, He sende his messagers to the Courte of Rome, to the Pope Alysandyr that than was, and thar he did Purchase that, by auctorite of the Pope and by his concent, was to hym grauntyd the lorchippe of the londe, and the londe-Pepill that crystyn shold be, and al clene was out of Ryght rule of crystyndome and ryght belewe, to brynge into ryght lawe of holy church, in the maner of England. That pryvylege forth, with an othyr [quod idem rex ab Adriano… perquisierat. in publica audientia ejusdem privilegii, cum universitatis assensu solemnis recitatis facta fuit.] that radyr was Purchasid of the Pope Adriane, that was to-fore Alexandyr, was sende ouer Into Irlande by Nycole, pryoure of Walyngeforde, and Willam Aldelines-sone; and was a consayle of al the clergy of Irland̛ y-gadderid to-giddyr at Watyrford. ther wer the pryuylegis y-shewyd, and y-radd Sollempnelych to-fore ham, and grauntyd hyghlych of al the comynys. The fourme of thay Pryuylegis, as thay wer endyted̛ At Rome a-latyne, y may not comly sette in Englysℏ, and therfor y [Fol. 17b.] Hit Leue; But the mest streynth is this: Whan the Pope Adryan Hadd Herde opynly the evyl lyfe, and the synfull, that the Pepell of Irland laddyn, wors than wilde bestis, and out of constituciones of holy churche and ryght be-lewe, he graunted̛ the kynge, that he sholde into Irland wende, forto adresse and sprede the termys of holy church, forto wythstonde and lete the ruene of synne [et vitiorum plantaria inde exstirpanda.] , forto a-mende the wickid dedis, and sette the good̛; forto Eneche religion of crystyndome, So that hit were