CHAPTER XXXV.
This whyle the kynge was in myche stryfe, wel two yere, agayn his Sonnes and har allience, both in Englande and in Normandy, and gascoygne; and So was peyned with trawail in wepyn, nyght and day, that no man ne myght more. But, for no wors enemy may none be, than thay that a man trusteth moste to, O thynge was, that most angyr hym didd: that the knyghtes that he hadd chose his body to kepe, in Whos handis his lyfe and his deth he betoke, for the mor Party, euery nyght wentyn to his Sones priuely; So that, whan the kynge ofte-tymys askyd aftyr hame, thay were not founde. Natheles, the battayll that was of So doutos begynnynge, hadd So good Endynge that, for the vnryght that his Sones hym didde so vnkyndely, hit Semyd bettyr that he foght by Powere of god̛, than by Erthely Powere. For in al Placys, the ouer-hande was his. And as hit Semyd fryst, that hit was for wrethe of Seynte Thomas-es deth that that vnhape hym befell, Also hit semyd ther-aftyr, whan he hadd dōn̄e asseth to holy churche, and pees made with the hooly martyr, with terys and repentaunce of herte, al his tene (by godys helpe) hym turned to gladnys. For aftyr the mych tene and trayson that he hadd sufferid al two yere. At the laste, was the battayl Smytten, at the whyche, be-twen the two hostys, Ther were the kynges Sonnes dyscomfyte, by Ralfe de Glanvil, that was Maystyr of the kynges hoste. Ther was take the kynge of Scotlande, and the Erle of Chestre, and the Erle of leycestre, and So many grete men, both of England and of beyonte See, that vnneth thay found prisonys to ham. Ther, aftyr al the trauail that the kynge hadde, and the Envy, and the costys al two yere, come the Sonnes to the faderis Pees, and madyn asseth, falsly, as hit was ther-aftyr wel Shewid̛ in dede. Of this vntrouth, Spake