CHAPTER II.
IN the tyme that this was so, was in Prisonne wyth the Prince of Walys, a knyght, whos Name was Robert Steues-Sonne, that sometyme hadd̛ y-be constabill of al Suthe Walis. and many yll tvrnys hadd y-don̄e vp-on the Princes men, when thay eny thyng̛ mysdedyn; and throgh traysoun of his owyn men, he was y-take and delyuerid̛ to the Prince. And thre yere he was holde in prison, are Macmurgℏ thedyr come. Oft the Prince hym̛ proferyd̛ to delyuer hym out of pryson, So that he wolde be his helpe to wer vp-on the kynge; but Robert was a trew man, and for nothyng̛ wold̛ do thynge wher-of he myght be ther-aftyr reprovid̛ of vntrowth //
Than,—throgh be-sechynge of the Byshope and of Moryce fiz-Geraud̛, that weryn Robertys two bretheryn on his Modyr syde,—he was delyueryd̛ out of Pryson on this manere: That he and Morice his brodyr sholde, the nexte Somyr, wende Into Irland̛, with har Powere, to helpe Macmurgℏ; and he sholde hym yeue the toun of weysford̛, with the twey nexte cantredes: and of this was good̛ swrte y-fondyd̛ on euery syde. / Whan this was al thus Spokyn̄, Macmurgh myght not lengyr Suffyr that he ne mvste to his Lond̛ wende, thegh he ne found̛ nat the aduentures that he Soght, suche as hym lykyd̛, ne none othyr Powere he ne broght wyth hym, than he out-ladd̛. / he had̛ shipe redy, and good̛ wynd̛, and Passyd̛ ouer into Irland, and boldely arryued̛ in londe ther-as he hadd̛ many Enemys and few frendys. / From the see he went to Fernys; and wel sympylly he lyued̛ there al the wyntyr, with the Clergy of the chyrche, whych wel fayre hym vndyrfonge, and by har Power to hym and to his, foundyn that ham was nede.