CHAPTER XXVI.
Whan the kynge had thus don̄ē, he lefte at watyrford, Robert Barnardessonne, with mych pepill; and, by Ossory, toke his way to Deuelyn. In that vyage, the kynge of Ossory came to hym, and yolde hym to the kynge. and whan he had bydd awhyle at deuelyn, thedyr came all the heghyst Irysℏ-men of leynystre, and be-soghten pees, and yeldyn ham to the kynge. Roryke Oconghoure, the kynge of connaght, ayeyn̄ēs the kynges messaungeris at the watyr of shynnyn,—that is to Say, hugh de Lacy and Willam aldelines Sone,—ther he yelde hym to the kynge; And the kynge of Myth also; So that ther was no man of any reputacioun that he ne come to the [Fol. 12b.] Kyngys owyn Body, or Sent messangeres forto Becomyn Hys man, Saue only thay of̘ vllyster // Than was fulfillid a prophesy that Seynt Molyng sayd: "To-for hym shal foote-fall the pryncys, and, throgh buxumfastnys, the lyme of pees shal vndyrfonge" // Merlynge sayd anothyr prophesy: "To his lyght, the foulys of the yland shullyn to-geddyr fle; and the mest of ham, with har wynges y-brante, shullyn ouer-throwyn in thraldome [corruent in capturam.] . the fywe delys shal be broght into one, and the Syxte shal ouercome the Strongyst placis of Irland̛" / Whan the Mydwyntyr came, many of the heghest men comyn to the kynges courte to feste; and mych wondyr thay had of the nobil seruyce that they ther Sawe, and of the mych plente of mete and of drynke, of bordys sette, and fayre clothis vpoñ; the hey Service of panetrye and buttellerye, and rych wesselis of golde and Syluyr; the many maner metys of kechen, on the maner of Englond̛, whych they had neuer ther-to-for Seyn [Why wasn't this crane bit englisht? 'carne gruina, quam hactenus abhorruerant, regia voluntate passim per aulam vesci coeperunt.'—Op. v. 280.] . Aftyr that the feste was ryaly holde, euery man went wyth gladnys into his owyn. In that tyme weryn bow-men at Fynglas y-herberowid̛, and wentyn Into church-hay, and hewyn adov̄n̄ trees that Seyntys by olde tym had ther Sette: there came Sodayn deth vpon ham eueryon̛.