CHAPTER XXIII.
THe mene-tyme that this was / Roueryke, the kynge of mythe [rex monoculus Medensis Ororicius…cum multitudine magna, circa kalendas Septembris, Dubliniam venit.—Op. v. 274.] ,—be-helde his tyme, and that the Erle out of lond was, and Reymond̛ and lytil peple was lefte at Deuelyn, the Cite and the contrey to kepe,—wyth mych pepyl come to deuelyn about myd hervyst, and assaylid the wallis of the Cite with gret Streynth and grymly cry, and wend wel to haue take the Cite, and al that therin was. But ther streynthis and bolnys, hit mote nede Schow hym-Selfe: Miles de Cogan and his men priuely wentyn out, and smote grymly vpon ham, so that in lytyll whyle thay weryn al dyscomfyted̛. But Roury hym-Selfe vnneth Escapyd̛; and his Sonne, a wel bolde man amonge his pepil, was ther Slayn, with many oþer.