English conquest of Ireland : A.D. 1166-1185 : mainly from the 'Expugnatio hibernica' of Giraldus Cambrensis : part I, the text / edited by Frederick J. Furnivall.

CHAPTER XVI.

Aftyr this, Spronge grete Spech in-to al the lond, and mych dreded̛ the strange comen men. Than gadderid ham to-gederes al the clerkys and the wysmen of the land̛ at Ardmagℏ; and of this pepil-is comynge, was mych Speche and longe delyaunce. At the last, comynly thay acordid̛ al herto, that, for the synne of the Pepill, this mys-aduenture ham ys by-fall, specialy that whan thay foundyn Englysℏ-men childryn to sill, that Marchandis and roberes wold bryng to the lond, thay were woned to by ham, and pute ham in thraldome; And

that, throw godis his owyn wreth hit was, that as the sylleris weryn to-for broght in thraldome, also the byeris sholdyn be broght in thraldome aftyr / For hit was somtyme that the pepil of England̛ the maner of har kyngdome was al y-holde: Whan thay had none othyr thynge that thay myght take to, Radyr than thay wolde suffyr any dyssese, thay wold syll har childyr and har othyr kynnes-men, both into Irland and into othyr landis. Therfor hit may wel be trouth that, as the byeris, also the Silleris, ofte Seruyd̛ well, throgh So wicked doynge, to be broght in thraldome. There hit was in that consayll promysyd̛, and by assent of al comynly y-Set, that al the Englysℏ-men in the lond that in thraldome weryn, shold ben delyuerid, and frely lette goo whedyr So thay wolde.